DILI, STLTIMORLESTE.com – Tribunal Judisial Primeira Instansia Dili (TJPID) liu husi desizaun ikus ba krime ameasa no Ofensa Integridade Fizika Simples kondena arguidu inisial AO pena supensaun, tanba komete krime hasoru lezada inisial DV.
Iha desizaun nee, Juiz prosesu Fransisca Cabral deklara katak, iha krime rua mak Ministeriu Publiku akuza ba arguidu, krime ameasa no krime Ofensa Integridade Fizika Simples.
Juiza deklara, iha sala julgamentu depois rona tiha arguidu no lezada nia deklarasaun, Tribunal haree katak provadu ba iha krime Ofensa Intergidade Fizika Simples, no la provadu ba iha krime Ameasa.
Tanba nee Tribunal tetu deklarasaun sira hotu, atu halo prevensaun ba iha futuru, ikus mai Tribunal diside aplika pena prizaun fulan 5, suspende tinan rua ba iha arguidu.
Tribunal mos fo hanoin ba iha arguidu, durante periodu suspensaun labele pratika aktu krime iha liur, se pratika maka arguidu sei kumpri fali prizaun fulan 5.
Tuir akuzasaun katak, iha loron 21 fulan Abril tinan 2025 iha Tibar, momentu neeba arguidu konduz karreta vaskolante ida atu tula fatuk, no lezada mos hase arguidu katak, dia liu ita hadia tiha estrada nee atu kareta liu labele soke malu.
Lezada sei koalia hela derepente arguidu tun husi kareta mai kaer kedan ho besi kanu ida atu baku lezada, maibe lezada kaer metin tiha besi nee, hodi halo monu ba rai.
Bainhira besi nee monu tiha ba rai, arguidu uza liman tuku dala rua kona kedan lezada nia tilun hun, halo lezada monu kedan ba rai, hafoin arguidu kontinua rasta lezada nia fuuk riba ba fatuk.
Hotu tiha arguidu mos ameasa lezada, halo lezada tauk.
Tanba nee, MP akuza arguidu komete krime Ofensa Integridade Fisika Simples, no krime Ameasa.
Desizaun nee lee husi Juiz Fransisca Cabral, Ministeriu Publiku reprezenta husi Prokurador nain ida, arguidu hetan asistensia legal husi Defensor Publiku nain ida.
Jornalista: Terezinha De Deus
Editora: Carme Ximenes
