DILI, STLTIMORLESTE.com – Tribunal Judisial Primeira Instansia Dili, liu husi desizaun ba krimi Violensia Domestika ho Forma Ofensa Integridade Fisika Simples, kondena arguidu TS hanesan laen ho pena suspensaun, tanba provadu pratika krimi hasoru lezada hanesan feen ho inisial RPJ.
Iha desizaun nee Juiza Jumiati Freitas deklara katak, arguidu nega ba faktus balu, maibe lezada reforsa arguidu laos tuku deit lezada, maibe riba lezada ba rai, sama kotuk laran, atu rega tan be manas ba lezada, maibe lezada halai tiha ba toos, no hamlaha hodi han hahan matak.
Tribunal entende katak, arguidu laos foin mai iha Tribunal maibe antes nee arguidu mos mai ona, no repete hahalok hanesan tanba nee hatudu katak, arguidu la tauk.
Tribunal tetu deklarasaun sira hotu, no ikus mai Tribunal deside hodi aplika pena prizaun tinan rua, suspende tinan 3 ba arguidu. Tribunal mos husu arguidu atu selu indimizasaun ba lezada US$ 300.00.
Tribunal mos bandu arguidu atu labele kontaktu ba lezada, no aproxima husi lezada durante tinan ida.
Tribunal mos esplika, durante periodu suspensaun durante tinan rua nia laran, arguidu labele pratika krime, se pratika Tribunal halo revogasaun hodi arguidu kumpri fali Prizaun.
Tribunal mos husu, atu arguidu la aseita ho desizaun nee, bele liu husi defeza atu halo rekursu.
Tuir akuzasaun neebe iha katak, iha loron 20 fulan Junhu arguidu tuku ofendida nia tilun sorin loos dala ida, no tuku tan ofendida nia tilun sorin karuk, halo ofendida monu tun ba rai, hafoin tur iha ofendida nia hirus matan, no tuku tan dala ida kona iha ofendida nia ulun fatuk halo ofendida dezmaia.
Haree ofendida la book an arguida ba tiha, no lakleur ofendida hader hodi halai ba duut laran subar iha neeba.
Banhira haree loron matan monu, ofendida halai tutuir kafe laran, no hamlaha ofendida fokit ema nia aifarinha hodi han matak, no kalan ofendida lao iha ailaran deit, to hetan Xefe Aldeia maka foin telefone ba OPS.
Tanba nee Ministeriu Publiku akuza arguida komete krime Violensia Domestika ho Forma Ofensa Integridade Fisika Simples, neebe previstu iha artigu 145 husi KodiguPenal.
Prosesu nee, prezide husi Juiz Singular Jumiati Freitas, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Marsal Mascarinhas.
Jornalista: Terezinha De Deus
Editora: Carme Ximenes
