DILI, STLTIMORLESTE.com – Tribunal Judisial Primera Instansia Dili liu husi desizaun ikus, desidi aplika pena prizaun tinan 4 ba arguidu ho inisial DG, tanba komete krimi hasoru lezadu ho inisial MS.
Iha loron Sesta, (13/12/2024) Juiz prosesu Ivan Suritai deklara katak, Tribunal konsidera provadu arguidu komete krimi rua Ofensa Integridade Fizika Simples no krimi Arma Branka.
Tribunal konsidera, provadu mos katak arguidu kaer duni arma branka, tuir faktus neebe iha no reforsa tan ho deklarasaun husi arguidu nian. Tribunal deklara maske arguidu nega la komete krime Ofensa Simples tanba dehan momentu neeba arguidu dudu deit lezadu, maibe bazeia ba lezadu nia deklarasaun katak, momentu neeba arguidu lori duni liman tuku lezadu nia hirus matan.
Tribunal bazeia ba lezadu nia deklarasaun nee, konsidera katak deklarasaun nee provadu.
Ikus mai, Tribunal Koletivu konsidera provadu ba akuzasaun neebe iha, hodi desidi aplika pena prizaun tinan 4 ba arguidu.
Lee tiha desizaun, Juiz prosesu mos deklara, arguidu la aseita ho desizaun nee bele liu husi nia defeza hodi halo rekursu, durante loron 30 nia laran.
Prosesu nee kaer husi Juiz Koletivu, Ivan Suritai, Zulmira Auxiladora, Arjentino Nunes, Ministeriu Publiku reprezenta husi Prokurador Ricardo Leite, arguidu hetan asistensia legal husi Defensor Publiku Humberto Alves.
(ter)
