DILI, STLTIMORLESTE.com – Tribunal Judisial Primera Instansia Dili liu husi desizaun ikus kondena arguidu ho inisial KB pena multa, tanba halo agresaun hasoru nia feen lezada ho inisial CF.
Iha desizaun loron Segunda (18/11/2024), Juiz Ivan Suritai deklara, prosesu ida nee Ministeriu Publiku akuza arguidu ho krime maus tratus. Depois rona tiha arguidu nia deklarasaun, tribunal konsidera aktu refere la prienxe ba iha krime maus tratus.
Tanba nee, koletivu desidi hodi halo alterasaun kualifilasaun juridika husi krime maus tratus ba iha krime violensia domestika ho forma ofensa integridade fizika simples.
Juiz prosesu deklara, bazeia ba alterasaun refere, Tribunal konsidera provadu arguidu komete krime Violensia Domestika ho Forma Ofensa Integridade Fizika Simples katak, arguidu halo duni agresaun hasoru lezada.
Tribunal haree katak, krime refere nia kastigu husi loron 30 too tinan 3 iha prizaun, Tribunal tetu arguidu foin primera vez mai iha Tribunal, arepende ona ba aktu sira nee, ikus mai Tribunal desidi aplika pena multa ba arguidu.
Iha pena nee Tribunal sita katak, arguidu sei selu pena multa US$ 120, kada loron ida US$ 1.00, hamutuk loron 120. Se arguidu la selu pena multa, arguidu sei kumpri prizaun alternativu durante loron 80.
Lee tiha desizaun nee, Tribunal mos husu arguidu la aseita bele liu husi nia defeza halo rekursu.
Tuir akuzasaun neebe iha katak, ofendida CF iha relasaun ho arguidu hanesan feen no laen.
Iha loron 21 fulan Maiu tinan 2023, iha Suku Madohi, momentu neeba arguidu sai husi uma atu ba joga beliar, maibe lezada la hatan hodi hamosu diskusaun.
Iha diskusaun nee, arguidu halo agresaun ba lezada, dudu lezada, tuku dala ida kona iha matan, tuku dala barak iha kanuruk rezulta moras.
Konsekuensia husi arguidu nia hahalok nee, halo lezada sente moras hodi ba hatoo keixa.
Tanba nee, Ministeriu Publiku akuza arguidu komete krime Maus Tratus ba Konjunje neebe previstu iha artigu 154 no forma Violensia Domestika lei numeru 7/2010.
(ter)
