DILI, STLTIMORLESTE.com – Tribunal Judisial Primeira Instansia Dili liu husi desizaun ikus, kondena arguidu ho inisial MT pena prizaun tinan 4.
Iha prosesu ida nee arguidu hamutuk nain 13, maibe iha desizaun ba prosesu nee, Tribunal desidi hodi kondena arguidu ho inisial MT pena prizaun tinan 4, tanba konsidera provadu komete krimi Arma Branka ho Krimi Ofensa Grave hasoru lezadu MS.
No arguidu ho inisial LS Tribunal absolve, tanba konsidera la envolve iha prosesu nee. Maibe arguidu nain 11 Tribunal kondena ho pena suspensaun, tanba haree katak sira arepende ba faktus neebe iha, sira mos prontu atu hadia fali uma neebe sira halo estragus.
“Hanesan defeza la konkorda ho desizaun neebe aplika pena tinan 4 ba hau nia kliente, tanba nee hau sei halo rekursu,” dehan Defeza Manuel Amaral ba STL iha Kaikoli, Segunda (30/12/2024).
Nia hatutan, kona-ba arguidu sira seluk neebe Tribunal aplika pena suspensaun defeza aseita, maibe kona-ba arguidu MT hetan pena efetivu defeza la aseita
Antes nee iha alegasaun, Prokurador Ricardo Leite mantein no akuzasaun neebe iha. No husu Tribunal atu kondena arguidu HS, PS ba krimi Ofensa Integridade Fizika Grave ho pena prizaun tinan 3. Ba arguidu JS ba krimi Ofena Integridade Fizika Grave ho pena prizaun tinan 4, tanba baku lezadu nia liman.
Ba arguidu AS no LGG ba krimi Arma Branka ho pena prizaun tinan 4, no arguidu ML ba krimi Ofensa Grave no krime Arma Branka ba pena prizaun tinan 5.
Ba arguidu CA, JC, AS, FG, HG, JO, ba krimi Danu Agravadu estradus uma ho pena suspensaun atu hadia fali uma refere, se la hadia tenke selu fali Indemnizasaun neebe lezadu husu.
Ba arguidu LS husu Tribunal atu absolve, tanba la hatene buat ida.
Enkunatu parte defeza, Manuel Amaral husu Tribunal atu halo alterasaun kualifikasaun juridika husi krimi Ofensa Grave ba Ofensa Simples, no krimi Danu Agravadu ba Danu Simples.
Kona-ba krimi Arma Branka, Defeza konsidera katak laos arguidu sira mak lori katana, tanba nee husu absolvisaun.
Tuir akuzasaun neebe iha katak, iha loron 31 fulan Outubru tinan 2022, iha area Sosmera, Aldeia Hatufae, Suku Leimea Kraik, Hatulia Munisipiu Ermera.
Iha loron nee lezadu Pedro Soares ho nia kaben Marta Gonsalves too iha area refere, membru IKS ka Kera Sakti sira hanesan Daniel, Miguel, HS, PS, hapara lezadu PS hodi sira tuku, tebe lisuk lezadu too liman tohar no arguidu JS mak uza ai baku tohar lezadu Pedro Soares nia liman.
Iha loron hanesan no liu tiha oras balu, lezadu Pedro Soares nia grupu buka tuir fali ema sira neebe baku lezadu Pedro Soares.
No rezulta husi pontu rua, lezadu Moises Soares membru IKS hetan tuda husi arguidu AS, hetan baku husi arguidu LBG no hetan taa ho katana husi arguidu MT.
Lezadu ML hetan tuda husi arguidu CA iha rentos, kotuk laran no ain tur.
No rezulta husi pontu rua, arguidu sira husi Kolimau 200 kontinua asaltu no tuda rahun uma lezadu Raul Soares nian hetan estragus total, no arguidu sira neebe estragus uma lezadu nian mak hanesan JC, AS, FG, HG, CR, JO, LR.
Konsekuensia husi arguidu nia hahalok sira nee, lezadu sira hetan taa ho katana, balu hetan liman tohar, no uma ida hetan estraga total, no halo komunidade sira trauma ho akontesimentu nee.
Tanba nee, Ministeriu Publiku konstitui arguidu sira hanesan CA, JS, AS, JS, HS, PS FG, HG, AS, LBG, MT, JO, LR nuudar ko-autor material ho forma konsumada, pratika konkursu ba krime ida, Ofensa Integridade Fizika Simples, Ofensa Integridade Fizika Grave, Danu Agravadu no Arma Branka.
Audensia julgamentu nee prezide husi Juiz Koletivu, Jumiaty Freitas, Jose Gonsalves, Jose Quintao, Miniateriu Publiku reprezenta husi Prokurador Ricardo Leite, arguidu sira hetan asistensia legal husi Defensor Publiku Manuel Amaral.
(ter)
