DILI, STLTIMORLESTE.com – Jurista Timor oan konsidera katak, importante duni halao programa julgamentu movel, hodi lori justisa hakbesik ba iha komunidade sira.
Tuir Jurista Sergio Dias Quintas katak, Tribunal movel nee importante, tanba fo benefisiu no bele ajuda intervenentes prosesuais la bele gasta tempu, no osan barak hodi desloka ba sede Tribunal neebe dook husi sira nia hela fatin. “Ita hotu hatene katak, Tribunal movel nee nia objetivu mak hakbesik justisa ba povu, liu-liu ba sira hirak neebe dook husi kapital nasaun no munisipiu neebe la eziste sede Tribunal, entaun julgamentu movel nee nia finalidade lori justisa ba povu neebe kbiit laek hodi asegura sira nia direitu no dever nuudar sidadaun,” dehan Sergio ba STL iha Kaikoli, Tersa (24/02/2026).
Nia hatutan, bainhira estadu seidauk implementa lei organizasaun judisiaria, mak.nia hanoin Tribunal movel nee kontinua realiza, tanba nia impaktu ba sidadaun neebe moris iha area rurais.
Nia sublina, haree husi parte seluk julgamentu movel nee, parte ida hodi kontribui para bele reduz numeru kazu pendente, tanba wainhira intervinentes prosesuais sira la konsege marka prezensa iha sede Tribunal, julgamentu movel mak sai alternativu hodi rezolve kestaun nee.
Iha fatin ketak, Akademiku UNTL, Rafael de Jesus dehan, presiza duni iha julgamentu movel, hodi lori justisa hakbesik ba komunidade sira.
“Hau hanoin programa julgamentu movel importante tebes, tanba nee husu atu kontinua halao programa nee, atu lori justisa hakbesik ba komunidade neebe presiza,” dehan nia.
Afirma tan, ohin loron komunidade balu labele mai too iha kapital tanba distansia neebe dook, tanba nee lori duni justisa hakbesik ba sira liu husi julgamentu movel.
(ter)
