AMBENO, STLTIMORLESTE.com – Ezekusaun Orsamentu Jeral Estadu (OJE) tinan 2025, iha Sekretariu Rejional Asuntu Saude (SRAS) iha trimestre primeiru hahu husi fulan Janeiru, Fevereiru no Marsu tinan ida nee atinji ona 24%.
Informasaun nee hatoo husi Sekretariu Rejional Asuntu Saude, Luis de Jesus Neno ba STL iha Salaun Administrasaun Munisipal Oekusi bairru Nunbei kapital Oekusi, Segunda (14/04/2025).
“Hau haree katak, iha SRAS iha trimestral primeiru hahu husi Janeiru, Fevereiru no Marsu tinan 2025, ezekuta ona orsamentu hamutuk 24% no ezekusaun orsamentu ba Autoridade Rejiaun Administrativu Espesial Oekusi-Ambeno (RAEOA), nia ezekusaun ate agora atinji ona 29%,” dehan SRAS, Luis de Jesus Neno.
Nia prespetiva katak, karik ezekusaun orsamentu kontinua hanesan nee maka orsamentu neebe aloka mai RAEOA, iha fin do Ano, ninia ezekusaun bele atinji 100%, tanba ninia tarjeitu no indikador kada tinan 25%.
“Sei kada trimestral maka ezekuta orsamentu nee ho 24% signifika falta 1% atu atinji 25%, nunee iha fin do ano iha tinan 2025 ita bele atinji 100% kuandu atividades kontinua lao diak, la iha problema impedimentu, entaun fin do ano ita bele ezekuta ho prosentu neebe maka diak, tanba tinan kotuk kolega sira maka halo planu, ami maka ezekuta, entaun ezekusaun OJE tinan 2024 konsege ezekuta 84% ho moto, Saude iha ita idak-idak nia liman rasik, entaun husi finansa dehan Bom Ezekuta, entaun buat hotu-hotu diak,” afirma nia.
Tuir observasaun STL iha Salaun Administrasaun Munisipiu Oekusi, Prezidente Autoridade ho Sekretariu Rejional sira hotu inklui Diretor no Xefe Departementu sira, entujiazmu tebes hodi partisipa maksimu iha PAA nasional mai Oekusi no kada Sekretariu Rejional sira aprezenta sira nia planu anual tinan 2026 ba Ministeriu Finansa (MF) hodi prezeta kedan iha planu orsamental atu hetan aprovasaun iha Konselhu Ministru (KM), nunee aprezenta ba iha Membru Parlamentu Nasional hodi deskute no aprova iha final global tuir kalendariu neebe estabelese kada fin do ano.
(jos)
