BAUKAU, STLTIMORLESTE.com – Telekomunikasi 3 neebe eziste iha Timor Leste hanesan Timor Telekom, Telemor no Telkomcel la fo asesu rede internet ba komunidade husi Aldeia 3 iha Suku Libagua, Postu Administrativu Laga, Munisipiu Baukau.
Kestaun nee hatoo husi Xefe Suku Libagua, Francisco Carvalho Gama ba STL iha Libagua Laga, Kinta (21/11/2024).
“Linha internet iha Suku Libagua, liu-liu Aldeia 3 iha sorin hanesan Buibata, Larimuta no Larifanu nee sira la asesu husi TT no Telemor, maibe ida Telkomsel nee mos hanesan,” nia dehan
Lideransa Komunitariu nee sublina, husi Aldeia 3 refere durante nee utiliza SIM card husi Telekomunikasaun TT no Telkomsel, maibe iha sorin deit mak bele asesu, nunee komunidade buka atu informasaun sira iha rai laran liu husi telefone tenke sae foho foin hetan rede internet hodi asesu.
Francisco rekomenda ba parte relevante hanesan Sekretariu Estadu Komunikasaun Sosial atu haree asuntu refere, tanba durante Timor ukun aan too ohin loron, mezmu komunidade sira kauze asesu hotu ona rede internet hodi fasilita asesu ba Informasaun atual sira neebe akontese iha rai laran no rai liur, maibe komunidade husi Aldeia 3 refere kontinua tarde akompanha informasaun sira.
Aleinde rede ba internet, rede ba telefone mos sei difikulta komunidade sira, liu-liu Telemor seidauk fo asesu, enkuantu husi TT bele bele asesu, maibe bainhira tempu udan no anin, fo mos impaktu ba utilizador sira.Maibe Kona-ba rede telefone husi Telkomsel asesu hela, maibe iha Aldeia 3 refere maioria utilizador sira la duun uza.
(EST 2)
