DILI, STLTIMORLESTE.com – Ministeriu Publiku (MP) iha alegasaun ba krimi Danu Agravadu solisita ba iha Tribunal Koletivu atu kondena arguidu ho inisial IA, tanba komete krimi Danu Agravadu hodi harahun lezadu ho inisial LZY nia sasan.
Iha alegasaun loron Tersa nee (11/03/2025) Prokurador Pedro Baptista deklara katak, maske arguidu sira notifika edital, maibe Ministeriu Publiku mantein ho akuzasaun neebe iha. No Ministeriu Publiku husu Tribunal atu kondena arguidu sira ho pena prizaun tinan 2 suspende ba tinan 3.
Enkuantu tuir defeza arguidu sira nian, Joana Cristina katak, husu ba iha Tribunal Koletivu tetu sirkunstansia hotu, hodi aplika pena neebe justu ba arguidu sira.
Rona tiha deklarasaun, Tribunal adia ba loron seluk hodi rona desizaun.
Tuir akuzasaun neebe iha katak, iha loron 07 fulan Outubru tinan 2016, iha oras 16:30 OTL, lezadu LZY hapara hasai suspeitu R, S ho AP husi servisu, tanba komportamentu suspeitu sira nian ladun diak tanba foti fali sasan iha loja laran.
Bainhira lezadu hapara servisu ba suspeitu sira, lezadu mos fo kompensasaun ba suspeitu sira, kada ema ida hetan osan montante US$ 400.
Momentu suspeitu sira simu tiha osan nee husi lezadu, suspeitu sira mos sai ona ba iha liur, bainhira too iha liur, suspeitu sira mos bolu tan arguidu IA ho EC nomos P, hamutuk hodi baku rahun lezadu nia vidru janela haat (4), arguidu ho suspeitu sira lori tan ho fatuk hodi tuda lisuk kareta lezadu nian mak para hela iha fatin hodi rezulta kabetok tiha, iha biban nee arguidu sira kontinua lori fatuk hodi tuda rahun tan lezadu nia odamatan vidru loja nian rua inklui dasin hodi tetu sasan.
Sasan sira neebe mak hetan estraga no rahun mak hanesan vidru janela haat (4), kada vidru ho folin osan US$ 200, haat nee hamutuk US$ 800, kareta nia body hetan kabetok, lezadu lori ba hadia selu ho folin US$ 200, odamatan vidru rua mak rahun, kada ida ho folin US$ 130, rua nee hamutuk US$ 260, dasin ida nee ho folin osan US$300, total prezuiju ba lezadu hamutuk US$ 3.230.
Arguidu sira halo ho forma livre, ho propozitu konkretizadu lori fatuk hodi tuda rahun vidru janela ho odamatan nomos estraga sasan mak hanesan dasin inklui kareta lezadu nian, tuir buat neebe mak hakerek ona iha leten, hatene mos katak sasan sira laos partense ba arguidu sira.
Hahalok arguidu nian kriminalmente punivel. Ho hahalok nee, konsidera arguidu IA hanesan ko-autor material ho forma konsumadu, pratika krimi Danu Agravadu, previstu no punidu tuir artigu 259 husi Kodigu Penal.
Iha sala julgamentu laran sasin Miguel da Costa deklara katak, momentu neeba sasin servisu hamutuk iha loja nee, no razaun mosu problema tanba momentu neeba arguidu sira naok mangera, ho razaun ida nee mak patraun deside hodi hasai arguidu sira husi servisu.
Sasin deklara, momentu neeba arguidu sira lori fatuk tuda kona vidru rahun, hodi kauza lezada feto ida mos hetan kanek. No lezada kanek raan sai, sasin sira mos lori lezada tama ba iha uma laran hodi hamoos lezada nia raan, hodi lori lezada ba hospital. No sasin sira sai mai liur haree kareta nia vidru kotuk rahun, maibe se mak halo rahun sasin la haree tanba sasin iha hela uma laran.
Sasin haree deit ho matan kona-ba arguidu sira tuda janela vidru rahun, maibe kona-ba kareta sasin la haree ho matan tanba iha hela uma laran.
Aleinde nee, sasin Estanislau De Jesus deklara, patraun hasai trabalhador hamutuk nain 4, tanba foti loja nain nia sasan. Sasin deklara, estragus neebe arguidu sira halo rahun mak hanesan vidru janela nian inklui kareta.
Audensia julgamentu nee prezinde husi Juiz Kolektivu, Jose Gonsalves, Jumiaty Freitas, Jose Quintao, Ministeriu Publiku reprezenta husi Prokurador Pedro Baptista, no arguidu sira hetan asistensia legal husi Defensora Publika, Joana Cristina.
(ter)
