DILI, STLTIMORLESTE.com – Ministeriu Publiku iha alegasaun ba krimi Maus Tratus ba Konjunje neebe previstu iha artigu 154 Kodigu Penal ho forma Violensia Domestika lei numeru 7/2010, husu ba iha Tribunal atu aplika pena suspensaun ba arguidu ho inisial JMS, tanba tuku feen ka lezada ho inisial ARC nia ibun ho kelen.
Alegasaun neebe halao iha loron Tersa nee (05/11/2024), Prokurador Pedro Baptista mantein ho akuzasaun neebe iha katak, arguidu pratika duni krimi hasoru lezada, hanesan tuku dala ida kona iha lezada nia ibun, no tuku dala ida kona iha lezada nia kelen.
Prokurador haree katak, aktu arguidu nian nee Presiza prevensaun, se la iha prevensaun ba oin bele akontese fali, ho nunee iha alegasaun refere Prokurador mantein ho akuzasaun neebe iha, tanba bazeia ba arguidu nia deklarasaun no mos relatoriu mediku sira neebe junta iha autus, tanba nee Prokurador husu ba iha Tribunal Koletivu atu aplika pena prizaun tinan 2 ba arguidu no suspende nia ezekusaun tinan 2.
Enkuantu husi defeza Jose Maria Guterres dehan, arguidu arepende tebes ba nia hahalok nee, arguidu foin primera vez mai iha Tribunal, sira mos halo akordu dame malu nian ida, tanba nee Defeza husu ba iha Tribunal atu aplika pena neebe justu ba iha arguidu.
Rona tiha alegasaun, Tribunal adia ba loron 18 fulan nee atu rona desizaun.
Tuir faktus neebe iha katak, iha loron 21 fulan Abril tinan 2023, iha Bebonuk. Iha oras tuku 10 kalan, arguidu sai husi sira nia uma atu ba vizita arguidu nia familia sira.
Maibe iha momentu neeba lezada la hatan, tanba kalan ona, ho ida nee mosu diskusaun iha sira nain rua nia kuartu laran, too arguidu nervozu lori liman tuku dala ida kona iha lezada nia ibun, no lori tuku dala ida kona iha lezada nia kelen.
Konsekuensia husi arguidu nia hahalok nee, halo lezada sente moras hodi ba hato keixa.
Tanba nee, Ministeriu Publiku akuza arguidu ho krime Maus Tratus ba Konjunje neebe previstu iha artigu 154 Kodigu Penal no forma Violensia Domestika lei numeru 7/2010.
Arguidu deklara, akontese duni problema maibe agora sira diak malu ona.
Audensia julgamentu nee prezide husi Juiz Koletivu, Arjentino Nunes, Zulmira Auxiladora, Ivan Suritai, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Jose Maria Guterres.
(ter)
