BAUKAU, STLTIMORLESTE.com – Mezmu fatin turizmu Uatabo’o laiha sintina, maibe atrai ona turista internasional husi nasaun oin-oin.
Turizmu refere lokaliza iha Aldeia Tasi, Suku Buruma, Postu Administrativu Baukau Vila, Munisipiu Baukau, neebe beleza furak no estranhu, tanba rai henek mutin, kondisaun tasi moos, besik nu’u kleuk, fatuk kadeli inklui fatin turizmu istoriku konhesidu naran uma portu.
Aleinde mos nia bonita seluk mak, liu husi komunidade sira nia badinas hanesan halo toos hafurak liu tan nia beleza, bainhira ho ro’o iha tasi klaran hateke hetan Uatabo’o nia matak mak iha turista sira nia matan.
Xefe Aldeia Tasi Julio Angelmo da Silva esplika, beleza Uatabo’o konsege atrai tebes turista lokal no internasional kada semana sempre iha vizitante, maibe daudaun seidauk iha kondisaun minimu atu fasilita vizitante sira, liu-liu fatin saneamentu.
“Ami rekomenda ba parte ministerial para harii mos saneamentu publiku parte turizmu nian, tanba dala barak vizitante sira mai atu soe foer ba neebe sira la hatene,” hateten Julio ba STL iha Uatabo’o, Tersa (15/10/2024).
Tuir nia hanoin, lo-loos parte Governu tenke dezenvolve no organiza fatin turizmu sira, inklui mos Uatabo’o, nunee bainhira hetan vizita husi turista lokal no internasional bele fo rendimentu ba nasaun liu husi selu taxa.
Iha sorin seluk, turista husi Nasaun Fransa, Daniel Fosaca akresenta, durante nia viajen ba nasaun sira iha mundu inklui Timor-Leste iha difirente tebes, tanba durante viajen ho ro’o, Timor nia tasi kondisaun neebe moos ho tasi ninin hafurak ho rai henek mutin, neebe furak liu ona iha Baukau mak fatin Uatabo’o.
Turista nee sublina, aleinde furak seluk mak turizmu kultural, agrikultura no seluk tan hanesan atetude komunidade sira nia hamnasa.
“Ba turista barak mak sei mai iha nee, tanba furak, maibe iha buat balun presiza hadia, tanba ita hateke ba mai hariis fatin laiha,” nia fundamenta.
Hatan ba kestaun nee, Servisu Munisipal Diresaun Gestaun Merkadu no Turizmu Baukau, Mario Freitas Belo rekonhese fatin turizmu Uatabo’o atrai tebes turista husi nasaun seluk hakarak vizita, neebe konsege roo boot atraka ona dala 6 ho volume turista barak, maibe laiha kondisaun hanesan fatin sanitasaun atu fasilita bainhira nesesidade obriga.
(EST 2)
