BAUKAU, STLTIMORLESTE.com – Membru Frente Klandestina sira husi Kaixa jeral Uatu-Leki konta istoria prosesu funu Libertasaun Nasional ba Arkivu Muzeum Rezistensia Timorense (AMRT) iha Munisipiu Baukau.
Estafeta Kaixa jeral Uatu-Leki, Juvinal Eduardo Cabral “Abut” espresa sentimentu kontente, tanba bele hetan oportunidade liu husi koperasaun servisu ho ekipa AMRT hodi konta sai istoria prosesu funu Libertasaun Nasiona ba AMRT hodi arkiva iha muzem da rezistensia.
“Programa muzem da rezistensia iha Baukau hahu husi dia 23 too dia 01 lembra hikas fali memoria sira neebe akontese ba rezistensia nia oan sira, liu liu ba FALINTIL sira no Guerrilheiros sira neebe iha,” hateten Abut ba jornalista sira iha Vila Vova, Baukau, Segunda (23/06/2025).
Nia informa, programa koperasaun konta istoria funu ba AMRT iha Buakau hahu iha loron 23 Junhu too loron 01 Julhu tinan nee neebe bele fo oportunidade ba jovem rezistensia sira inklui funu nain sira hodi konta istoria pasadu timor nian ba ekipa AMRT hodi prezerva sai istoria fundamentu ba jerasaun sira tuir mai.
Tanba dadaun veteranus no membru kaixa klandestina sira kada tinan kontinua mate, nee fo impaktu ba istoria timor nian, liu liu prosesu luta libertasaun nasional nian, nunee Kaixa jeral Uatu-Leki foti insiativa kopera AMRT hodi prezerva istoria husi ema ida ba nasaun ida, tanba kada ema istoria diferente kontribui prosesu luta naruk nian.
“Veteranus barak mate, ao mesmu tempu frente klandestina mos nunee entaun ema ida ho istoria ida lakon, tanba nee ami buka meius halibur istoria hotu no entrega dokumentus rezistensia nian ba AMRT,” Abut akresenta.
Asuwain FALINTIL, Marciano da Cruz Saores “Boulesa”, apresia ho planu kaixa jeral Uatu-Leki, tanba bele foti insiativa konta istoria pasadu ba AMRT no kria espasu ba jovem rezistensia sira konta istoria neebe uluk idade sei kiik involve iha prosesu luta libertasaun nasional.
“Uluk funu, ferik katuas, ema idade kiik no idade boot feto mane hotu hotu, maibe ohin loron funu hotu labarik kiik laiha direitu fali, tanba nee halao ida nee labarik sira konta nia istoria partisipasaun hatama iha muzem nia mos iha istoria,” hateten Boulesa.
Vokal AMRT, Tadeu Amaral Sarmento, AMRT nafatin iha komitmentu rekoilha istoria no informasaun sira husi funu nain sira inklui jovem rezistensia sira hodi prezerva iha muzem da rezistensia nunee ba futuru sai referensia ba jerasaun kontinuador sira hatene liu tan istoria rezistensia timor nian.
“Ami halo tiha ona intervista rihun rua resin husi aman veteranu sira tantu frente klandestina nian no ami mos halo ona intervista ho forsa ativu sira, nomos intervista ona ita nia aman sira hanesan Lere, Taur, Mari atu nunee prezerva iha ba futuru nian,” hateten Tadeu.
Entertantu atividade konta istoria funu nee, ekipa AMRT elabora husi Kaixa jeral Uatu-Leki ho sub-kaixa 12 mak hanesan, Sub-kaixa Melodi, SP II, 21, Scorpion, Manuai, Nico demos,Sakunar, Materai, Matemoro, Lemorai, Zebra no Merpati.
(tom)
