DILI, STLTIMORLESTE.com – Reitor Universidade Católica Timorense (UCT) konvida Prezidente Republika Jose Ramos Horta atu halo lansamentu ba jornal akademiku neebe sei realiza iha 19 Setembru tinan nee.
Reitor UCT, Padre Joel Casmiro dehan, mai hasoru malu ho Prezidente Republika Jose Ramos Horta, hodi konvida Prezidente atu halo lansamentu ba jornal akademiku neebe sei realiza iha fulan Setembru nia laran.
“Ami mai konvida Xefe Estadu atu ba partisipa iha lansamentu jornal akademiku universidade nian ba depois tinan 4 neebe ami realiza ona. Iha ona jornal akademika ida neebe ami hanoin katak pertinente duni atu konvida sua exelensia hola parte no halo lansamentu ba jornal akademiku nee,” dehan Padre Joel Casmiro ba jornalista iha Palasiu Prezidensial Nicolao Lobato, Bairo Pite, Sesta (05/09/2025).
Reitor nee hatete, kontiudu husi jornal neebe atu lansa iha dia 19 fulan Setemru tinan ida nee mak franternidade umana koalia konaba dokumentus neebe asina iha Abu Dhabi, lolos realiza tinan 2 liu ba antes Sua Santidade Papa Francisco vizita Timor Leste, maibe tanba prosesu kleur tanba nee realiza fali iha fulan nee.
“Kontinudu ami fo tema kada fulan 6 volume primeiru nee nia topiku ba fraterinidade humana. Koalia konaba dokumentus Abu Dhabi nian neebe tuir lolos nee realiza iha tinan 2 liu ba, antes vizita Papa Francisco matebian mai ita nia rai doben ida nee. Komu prosesu nee lao kleur oituan ami foin bele konsege realiza, nunee ami mai aprezenta volume primeiru iha jornal sentifiku nee,” katak nia.
Iha biban nee Reitor mos konvida media sira atu hola parte mos serimonia lansamentu jornal akademiku neebe mak sei lansa iha semana oin ho topiku fraternidade humana.
Nia hatutan, jornal sientifiku neebe uza lingua portugues no ingles iha versaun rua iha laran, no lansamentu sei akontese iha dia 19 Setembru tuku 4 lokraik iha UCT.
Iha biban nee Prezidente Republika Jose Ramos Horta hatoo benvindo ba Reitor UCT, Padre Joel Casmiro nomos Dr. Cancio neebe hakat ona mai iha Palasiu Prezidensial hodi bele konvida Xefe Estadu, hodi bele halo lansamentu ba jornal akademiku neebe sei halao iha fulan ida nee nia laran.
Jornalista: Emerenciana Pinto
Editora: Domingas Gomes
