DILI, STLTIMORLESTE.com – Relasiona ho udan anin neebe mai la para iha kedas Sabadu (17/01/2026) too Segunda nee (19/01/2026), halo labarik balun senti tauk atu bá eskola.
Observasaun STL iha terenu Segunda (19/01/2026) nee, udan no anin neebe mai la para, halo komunidade balun senti tauk atu lao sai husi uma. Liu-liu iha Segunda dadersan nee, udan neebe tau rai iha tuku 6 ho balun akompana mos ho anin iha oras prepara atu bá servisu no eskola nian, halo komunidade balun la konsege tama servisu oras dader, no la lori oan sira bá eskola, tanba udan no anin boot. Sira neebe iha transporte hanesan kareta la senti tauk, sira neebe iha motor hein udan udan para mak bá servisu no lori oan bá eskola. Ba sira neebe lao ain labele bá, tanba tarde i distansia servisu fatin dok husi uma no eskola. Alende nee sira neebe iha transporte, balun mos tauk atu lori oan sira bá eskola, tanba udan no anin.
Tuir Komunidade Natalina Mendonca hatete, dader deit udan no anin makas tiha hanesan nee, halo ema atu sai husi uma mos senti tauk fali. Udan no anin loron hirak nee mai la para, halo dalan neebe ema atu lao ba, sai tiha be dalan ou mota fali. Lor-loron mak udan mai hela deit, dalan nee nakfila tiha bá be dalan ou mota.
“Udan ho anin iha loron hirak nee halo hau tauk fali. Iha Sabadu kedas rai mahon hela deit akompanha mos ho udan anin, halo hau tauk atu sai uma no lori hau nia oan bá eskola. Nunee mos ohin, dader nee deit udan makaas no akompanha mos ho anin, entaun hau lakohi lori hau nia oan bá eskola. Husik bá eskola falta loron 1 ka 2 tanba udan no anin nee la buat ida, profesor sira mos komprende, tanba labarik kiik. Hau nia oan Segundu ano hela, babain hau mak lori hela ba,” dehan nia bá STL iha Tasi-Tolu.
Nia hatete, bainhira udan no anin makas halo ema barak mak tauk atu sai husi uma, pior liutan haruka oan kiik sira bá eskola mesak.
(dom)
