AMBENO, STLTIMORLESTE.com – Akontese udan boot durante loron rua, hahu iha loron Segunda too Tersa dadersan madrugada, hamosu inundasaun iha Aldeia Banoko, Suku Lalisuk, Postu Administrativu Pantemamasaar, Rejiaun Administrativa Espesial Oecusse-Ambeno (RAEOA).
Tuir Kristiano da Costa katak, akontese udan boot too dadersan madrugada ohin, hamosu inundasaun, bee sae kuaze metru ida resin.
“Impaktu husi udan boot akontese iha Oecusse, bee sae makaas iha ami nia hela fatin, ropa, sprinbed no sasan uma laran la aproveita, tanba bee sae makaas, afeta bá uma kain 30 iha Suku Lalisuk,” dehan nia.
Bee sae nee laos mai husi irigasaun Tono, maibe bee tun husi Nono Faotmetan no Nono Kaunketu iha area Padiae.
Iha oportunidade nee, Xefe Suku Lalisuk, Hermenegildo Lalisuk dehan, impaktu husi udan boot nee afeta bá ninia komunidade iha Bairu Banoko, kuaze uma kain 30 mak enfrenta bee sae makaas.
“ita haree bee sae iha komunidade laos tanba dezastre naturais maibe kauza husi dezenvolvimentu, governu halo estrada laiha bee dalan tanba planu infraestura mak la tau konsiderasaun,” dehan nia.
Nia haktuir tan katak, iha sidade Oecusse, governu halo estrada kompletu kedan ho bee dalan husi Bairu Masin ba too Fronteira Sakato maibe husi parte Samoro mai too Suku Cunha ho Lalisuk laiha bee dalan.
“Ho inundasaun ida nee hau husu bá governu liu husi Diresaun Rejional Infraestrutura hahu planu ona atu tau iha planu halo bee dalan ka drainazen,” dehan nia.
Tuir observasaun STL iha terenu, husi parte Autoridade Protesaun Civil ho Diresaun Rejional Infraestrutura tun direitamente iha terenu hodi pbserva kondisaun povu iha area Banoko neebe povu enfrenta, balu hamoos sira nia uma laran tanba bee sae makaas.
(jos)
