AMBENO, STLTIMORLESTE.com – Udan boot akontese iha Oekusi-Ambeno ohin, lori triste boot ba inan faluk Amelia Coa, tanba halo nia uma monu.
Inan Faluk Amelia Coa ba STL iha ninia rezidensia Aldeia Kutete, Bairu Mahata, Suku Costa, Postu Administrativu Pantemakassar, Rejiaun Administrativu Espesial Oekusi-Ambeno Kuarta (30/10/2024), sente triste tanba udan boot nee lori dezastre ba nia tanba nia uma monu.
“Hau nia uma monu derrepente deit, bainhira udan ohin monu ba rai, rezulta hau nia uma bakufila. Hau nia uma durante nee, hela ho hau nia oan estudante sira mak hela ba no iha parte oin hau uza atu suku ropa hodi buka osan, maibe agora monu ona lori susar boot mai hau, sei la suku ona ropa iha fatin nee hodi buka osan sustenta hau nia nesesidade moris loron-loron, hanesan inan faluk,” dehan Amelia Coa.
Nia haktuir tan katak, uma monu nee, nuudar feto faluk la espera, derrepente monu halo ninia sasan iha uma laran nee hanesan mesin suku ropa ida triplek nakles no iha uma laran kama toba rahun inklui sasan dapur nian mos aat hotu.
“Hau nia uma nee konstrui husi hau nia kaben matebian Daniel Bana iha tinan 3 liu ba, agora nia husik hela hau ho hau nia oan rasik nain 4, mane ida no feto 3, inklui hau nia maun nia oan nain 2 neebe eskola iha Eskola Bazika Central (EBC) Mahata. Uma nee ami nain 7 mak hela iha fatin nee,” dehan nia.
Nia haktuir tan katak, kronolojia antes uma monu, sira tuur iha uma laran bainhira udan boot, derrepente rona buat ruma tarutu iha parte airin, nunee sira halai sai mak uma monu, la rezulta ema kanek maibe sasan uma laran la konsege salva tanba monu derrepente.
Nia dehan, hafoin uma monu, informa ba Autoridade Protesaun Civil Rejiaun Administrativu Espesial Oekusi-Ambeno no entrega ona apoiu emerjensia hanesan foos, ikan lata, supermi, ropa no seluk seluk tan.
“Ohin hau hetan apoiu ona emerjensia husi Autoridade Protesaun Civil neebe entrega direitamente husi Xefe Diresaun Nasional Gestaun Dezastre Rejional (DNGDR) Oekusi, Remigio Gomes da Silva,” nia esplika.
Nia haktuir tan katak, agora tempu udan ona mak uma monu, hanesan feto faluk hanoin kloot tebes, tanba la hatene hetan osan husi neebe atu bele konstrui fali uma nee.
Tuir observasaun STL iha ima inan faluk nee monu nee, halo nia ho nia oan sira triste.
(jos)
