DILI, STLTIMORLESTE.com – Udan boot kalan nee invade povu iha Rejiaun Administrativu Espesial Oekusi-Ambeno (RAEOA), hahu iha horiseik too kalan, bee lalehan suli makaas too mota sae iha fatin-fatin.
Quito dos Remedius Elu nuudar komunidade Bairu Cruz, Aldeia Oesono, Suku Costa, Postu Administrativu Pantemakassar RAEOA neebe STL asesu liu husi pajina ninia Facebook nota katak, komunidade iha Bairu Cruz kalan nee la toba tanba foin primeira vez akontese udan boot too bee sae nakonu iha estrada publiku neebe konstrui iha tinan 2016 husi Prezidente Autoridade dahuluk iha Oekusi-Ambeno.
“Kalan nee ami la toba tanba udan kontinua tau makaas nunee mota husi Orta ho Mota Bolkenat kontinua Suli makaas iha kalan nee, halo Ami povu iha Bairu Cruz trauma no lakohi toba,” dehan Quito.
Iha biban nee, Limpio Coelho ba STL (28/03/2025) konfesa katak, foin akontese primeiru iha Oekusi, mota sae makaas hanesan nee, too estrada nakonu ho rai tahu.
“Mota sae makaas hanesan nee foin primeira vez akontese iha Oekusi, liu-liu iha Bairu Cruz, nee mota sae nakonu iha estrada publiku, kalan nee ami labele toba tanba tauk,” dehan nia.
Ho preokupasaun nee Komunidade Bairu Cruz organiza malu tun direita taa ai boot iha Ponte Cruz, Aldeia Oesono, Postu Administrativu Pantemacassar RAEOA.
(jos)
