DILI, STLTIMORLESTE.com – Unidade Espesial Protesaun Sivil (UEPC – sigla português) fasilita formasaun loron 5 ba membru nain 50 inklui membru Cruz Vermelha de Timor-Leste (CVTL) nain 4, hodi hasae konhesimentu kona-ba oinsa halao salvamentu ba vitima dezastre iha mota no tasi ho profisional.
“Liu husi formasaun mak ita bele kapasita ita nia membru sira sai profisional, importansia husi formasaun ida nee atu hasae konhesimentu sira nian iha salvamentu maritima, tanba wainhira mosu dezastre ruma iha tasi ka mota ho eskala boot sira iha papel importante atu evakua no halo salvamentu ba komunidade nomos sira nia aan rasik,” hatete Komandante Unidade Espesial Protesaun Sivil, Fernando da Costa ba jornalista sira iha Kuartel UEPC, Komoro, Dili, Kuarta nee (02/04/2025).
Nia dehan, membru UEPC presiza treinamentu espesial hodi hasoru senariu oin-oin, liu-liu resposta lalais ba kualker dezastre neebe mosu iha teritoriu Timor laran tomak.
Iha tipu formasaun rua, ida mak kontinuasaun salvamentu maritima no ida mak ba kazuais sira hetan formasaun baze kona-ba nani nian.
“Ida neebe nani hatene ona mak hanorin fali uza ekipamentu luku tasi ho roo salvamentu. Kuandu vitima ida monu iha tasi ka mota la fasil salva nia vida, tanba nee too iha prátika ita sei fo vida rasik hodi salva ema nia vida,” nia informa .
Nia esplika, Membru Protesaun Sivil halo salvamentu iha terenu oin-oin, hanesan ai-laran, area foho lolon, area tasi klaran no ambiente urbanu neebe hahu dezenvolve daudaun.
Iha fatin hanesan, Diretor Emerjensia no Resposta, Jaime Gonçalves dos Santos informa, protesaun sivil halao knaar vital iha salva vida, tanba nee presiza iha formasaun espesial.
“Ida nee ita bolu “refreshment training” katak formasaun kontinuasaun, neebe foka ba salvamentu iha tasi no bee, espera katak ita boot sira bele ganha matenek husi instrutor sira no aumenta kapasidade, tanba ida nee faze importante, no fomasaun labele hela ho ida nee maibe kontinua, labele hein akontese mak tuir, maibe halo beibeik atu ita sai ema neebe profisional,” nia informa.
Nia hatutan, formandu sira tenke iha konhesimentu espesial iha salvamentu liu-liu prepara fiziku neebe diak, tanba wainhira iha terenu sei responsabiliza ba vitima no sira nia aan rasik.
Nunee mos Diretor DNGRD, Francisco Fátima da Cruz husu formandu sira atu buka esforsa aan hodi hatene materia husi instrutor sira.
“Formasaun nee importante atu kapasita aan hetan teoria diak wainhira hetan dezastre bele atua ho diak. Ida nee formasaun kontinuasaun, entaun buka meius atu hatene no aumenta konhesimentu,” nia deklara.
Francisco husu ba funsionariu sira atu durante loron lima nee partisipa ho masimu,.tanba sei iha mós nia kontinuasaun ba oin.
“Formasaun nee sei iha nia kontinuasaun, hodi hasae abilidade membru sira nian,” nia afirma.
(jen)
