DILI, STLTIMORLESTE.com – Unidade Fraternidade Umanu (UFU) husi Prezidensia Republika habelar hela programa sosializasaun ba estudante sira iha munisipiu Manufahi no Manatuto, ho mensajen prinsipal “Horiseik nuudar paixaun, ohin nuudar kompaixaun, aban sei sai kultura.”
Inisiativa ida nee bazeia ba desizaun istoriku Timor Leste nian iha tinan 2022, neebe fo Timor Leste hanesan nasaun dahuluk iha mundu atu adota formalmente dokumentu kona-ba Fraternidade Umana, neebe asina husi Papa Francisco no Grande Imam Al-Azhar nian, Ahmed Al-Tayyeb.
Tuir Komunikadu neebe STL asesu husi media PR Tersa nee (24/06/2025) katak, programa nee ho objetivu atu kuda ba juventude timoroan valor sira hanesan prinsipiu konvivensia pasifika, respeita malu no komprensaun entre komunidade sira hotu, hodi kontribui ba harii sosiedade ida armonioza liu.
Lider eskola Marcelano Fernandes, husi Eskola Bazika Sentral Clako (Manufahi), destaka ninia relevansia ba juventude no pas iha rai-laran.
Entretantu, Napoleão da Silva Sarmento, diretor Eskola Monsenor Aicar Soibada (Manatuto), sublina importansia atu Timoroan sira kompriende didiak dokumentu nee, haree ba papel pioneiru neebe Timor-Leste halao iha nivel mundial.
Nunee mos Madre Luciana FSG mos reforsa programa nia valor iha hanorin respeitu, tulun malu no motiva alunu sira atu fahe prinsipiu sira-nee iha sira-nia komunidade, destaka mos wainhira sira simu inisiativa nee ho pozitivu no ninia alinamentu ho valor fundamental sira sosiedade timoroan nian.
Ministeriu Edukasaun mos hametin esforsu sira-nee, hodi prepara atu integra prinsipiu sira Fraternidade Umanu nian iha kurrikulu Siklu Ensinu Baziku (EBC) da-3 nian, ho implementasaun neebe planeia ona ba tinan
eskolar tuir mai. Integrasaun ida nee hakarak atu garante katak valor sira kompaixaun no solidariedade nian transmite komesa husi idade kiik, ho objetivu atu transforma sira ba norma kultural ida neebe dura iha nasaun tomak.
Nunee mos Tuir Asesor Prezidensial Nunu Horta hatete katak, asaun edukasional nee fundamental atu haburas jerasaun ida neebe hetan orientasaun husi komprensaun mutua no dialogu pasifiku hanesan pilar esensial ba Timor Leste nia futuru.
(eme)
