DILI, STLTIMORLESTE.com – Timor Leste (TL) restaura independensia ba dala 23, maibe problema infraestrutura eskola balun too agora sei aat.
Haktuir Feliciano Gusmão hanesan profesor husi Ensinu Baziku Sentral Fatumeta ba jornalista STL liu husi telefone, Tersa nee (20/05/2025).
“Ohin loron ita komemora loron restaurasaun ba dala 23 ona, maibe kona-ba area edukasaun sei hakdasak hela, tanba iha infraestrutura ba manorin sira sei falta iha fatin hotu-hotu, infraestrutura eskola balun sei aat husi kalen no sei afeita ba prosesu ensinu aprendizajen ba ita nian estudantes sira,” dehan
nia.
Feliciano dehan, eskola balun too agora ninia kondisaun seidauk diak, menus fasilidade, sala de aula, buat hirak nee hotu ba oin presiza toma atensaun nafatin, hodi nunee bele hadia kualidade edukasaun neebe diak, liu-liu eskola publiku neebe eziste, tanba balun too agora sei menus profesores inklui fasilidade.
“Ita ukun aan tinan 23 ona, maibe ita nian area edukasaun lao seidauk masimu, no ba oin ita presiza hadia diak liu tan ita nian setor edukasaun, tanba ita hakarak kualidade edukasaun neebe diak,.primeiru kria kondisaun no prepara fasilidade,” nia rekomenda.
(jac)
