DILI, STLTIMORLESTE.com – Timor Leste sei Restaura Independensia ba dala 23 ho nia tema “Hametin Pas no Dezenvolvimentu”, nunee Primeiru Ministru (PM) Kay Rala Xanana Gusmão husu responsavel instituisaun estadu sira hotu atu ukun ho responsabilidade hodi lori dezenvolvimentu ba povu.
Xefe Governu nee hateten, tinan 23 Timor Leste restaura ona nia independensia, nunee husu ba sarani no povu hotu liu-liu sira neebe kaer responsabilidade iha instituisaun estatu atu servisu ho di’ak, tanba povu terus tiha ona tinan 24, agora terus nafatin ba iha tinan 23 restaurasaun independensia.
Mezmu nunee, ho konfiansa neebe povu fo, kontinua ho onestidade no integridade ho kompromisu ida nee mak povu ezije tanba povu mak halo funu, povu mak eroi, no husu ba sarani sira hotu reza nafatin atu hametin instituisaun Estadu neebe nakdoko hela bele hametin konsiensia.
“Timoroan sira neebe ohin loron kaer responsabilidade atu hadia rai ida nee, ita reza hodi tane aas nafatin dezenvolvimentu, povu merese atu hetan,” dehan PM Xanana Gusmão bainhira partisipa misa agrdesimentu ba restaurasaun independensia ba dala 23 iha Igreja Balide, Dili, Segunda nee (19/05/2025).
Primeiru Ministru hatete, restaurasaun independensia ba dala 23 husu mos ba joven foin sae sira atu hatene no komprende didiak tanba saida mak mosu restaurasaun independensia nee.
“Ita temi restaurasaun atu komprende didiak, liu-liu ba joven sira, ita proklama independensia iha 28 Novembru 1975, liu tiha loron sia ita hetan invazaun husi Indonezia durante funu tinan 24, tamba nee mak tinan kotuk ita selebra referendu tinan 15 ninia, ho povu mak kilat foun neebe malae sira seidauk hatene halo maibe povu Timor halo, kilat foun nee mak ho naran pregu, ita duni tiha Indonezia sira husi ita nia rai,” katak PM Xanana.
PM Xanana deklara, bainhira Timor manan duni sai tiha Indonezia husi Timor, United Nations Mission in East Timor (UNAMET) mai dehan atu ajuda no prepra Timor, tanba nee mak iha 20 Maiu 2002 ita restaura Independensia.
Iha fatin hanesan, Deonizia Tilman hanesan sarani neebe partisipa iha misa agradesimentu ba loron restaurasaun imdependensia ba dala-23 hatete, Timor Leste restaura ninia independensia ba dala-23 ona, maibe dezenvolvimentu balun lao balun la lao, ida la lao nee mak hanesan edukasaun no saude.
“Parte edukasaun nee seidauk lao tanba eskola iha area rural sei menus profesor, ate agora seidauk rezolve, tanba Ministra Edukasaun hasai hotu profesor voluntariu sira maibe seidauk rekruta fila fali atu taka profesor voluntariu sira neebe sira hasai nee, sira loke ona rekrutamentu maibe seidauk too nafatin, ida nee mak problema edukasaun nian. Ba saude, iha ospital menus aimoruk, iha area rural inan feton sira balun atu partus nee familia lalin ba de’it ospital tanba anbulansia la iha,” Deonizia preokupa.
(EST 1)
