DILI, STLTIMORLESTE.com – Jesus hanorin ninia eskolante sira katak, poder neebe hetan la garante ondra iha sosiedade nia leet, tanba nee bainhira ukun, Ukun Nain sira tenki sai atan hodi serbi povu, laos serbi fali familia ka grupu.
Kestaun nee hatoo husi Padre Richardo Pasang, SVD liu husi nia reflesaun loron Domingu (20/10/2024).
Nia dehan, iha dalan klaran ba Jerusalem nuudar via doloroza (dalan terus), Jesus no eskolante sira seluk hakfodak ho asuntu neebe Tiago no João husu.
“Mestre, ami hakarak ita haraik buat neebe ami husu. Halo ami nain rua ida tur iha Ita sorin kuanan, ida seluk iha sorin karuk iha ita nia reinu. Sira la kompreende katak dalan Jesus nian mak via doloroza dalan terus laos foku deit ba Jesus nia dalan gloria. Maibe, perguntas neebe sira husu hanesan loke tebes buat neebe rai hela (hakarak ruma) iha eskolante sira nia fuan. Sira fokus deit ba Jesus nia gloria. Haree fenomenu nee, Jesus hatete ema neebe hakarak sai boot, nia sei sai imi nia atan ema se hakarak sai ukun nain, nia sei sai nuudar ema hotu-hotu nia atan,” hatete Padre Richardo.
Jesus nia liafuan hirak nee tuir Padre Ricarhado katak, atu fo hanoin ba eskolante sira katak pozisaun, poder la garante ema atu hetan ondra iha sosiedade sira leet. Ema nebe hakarak hetan respeita husi ema seluk, uluk nanain nia tenke sai atan, sai servidor ba ema seluk.
Tanba tuir Saun Pedro atan katak ema ida neebe dedika nia aan no entrega nia moris ba Maromak.” Nia sosa tiha ita ho nia futar raan.’ (1 Ped 1 : 18-19) Profeta Isaias iha Primiera Leitura ohin loron afirma katak Maromak hodi susar hanehan nia atan, atan nee saran karik nia aan ba mate, atu selu salan nia tusan. Maski Jesus sosa tiha ona ita ho nia futar raan atu selu sala nia tusan, maibe ho dalan ida nee, ema hotu hetan rahun diak (salvasaun), ema hotu sei haksolok. Jesus hanorin ita atu fiel, leal, obedese ba Maromak iha ita nia moris tanba Jesus fiel, obedese ba Maromak nia planu salvasaun liu husi dalan terus atu ema hotu hetan salvasaun. Tan nee, surat ba Hebreu sira iha Segunda leitura, fo hanoin ita katak wainhira ita fiar, fiel, obedese ba Jesus Kristu liu husi dalan susar oi-oin, ita sei laran metin, hakbesik ba rahun diak nia hun katak Jesus Kristu rasik,” katak Padre nee.
Maibe nia dehan, poder sei la garante ema iha sosiedade atu bele hetan salvasaun.
“Nee duni, pozisaun ka poder neebe ita hakarak atu hetan iha ita moris, la garante atu hetan salvasaun. Jesus rasik dehan ba Tiago no João katak, “atu tur iha Hau sorin kuanan eh sorin karuk, ida nee laos ho hau. Fatin hirak nee nain iha ona. Jesus hakarak fo hanoin katak atu hetan pozisaun tuir ita hakarak, laos hau nia eskolante. Ema neebe hakarak atu sai hau nia eskolante mak ema neebe tenke sakrifisiu liu husi ‘via dolorosa’, prontu atu sai servidor no prontu atu mate. Perguntas ba ita prontu ka lae,” dehan nia.
Entretantu liu husi reflesaun nee Padre Richardo husu ba sarani sira hotu atu halo aan sai atan tuir Jesus nia hanorin.
(eme)
