BAUKAU, STLTIMORLESTE.com – Sirkuitu fiu eletrisidade rezulta uma ida mutuk iha Aldeia Bahamori, Suku Kaikua, Postu Administrativu Vemasi, Munisipiu Baukau.
Komadante Korpu Bombeiru Munisipiu Baukau, Cristalina Fraga Correia esplika, insendiu nee akontese iha loron 04 Dezembru 2025 parte meudia, bainhira uma nain sira toba dukur ona derepende ahi lakan alastra ba uma, tanba kauza husi karega telemovel.
“Akontese nee kauza husi sirkuitu, tanba informasaun neebe sira fo mai ami. Kauza husi insendiu sirkuitu nee tanba uma nain chas hela telefone oras meudia sira toba nee mak ahi han uma, tanba sira dehan chas telefone nee mak sirkuitu,” haktuir Cristalina ba STL iha nia knaar fatin Tirilolo, Baukau, Tersa (09/12/2025).
Nia sublina, sirkuitu eletrisidade née afeta ba uma tali ida didin ho piku pertense ba Carlos Freitas da Silva ho membru familia nain 6 neebe rezulta sira lakon sasan hanesan roupa, dokumentus eskola nian, osan no seluk tan iha insendiu nee, tanba la konsege salva.
Nia fundamenta, mezmu iha insendiu refere parte vitima sira kontaktu direita ba korpu bombeiru liu husi via telefone, nunee ekipa korpu bombeiru deskola kedas husi fatin Tirilolo Baukau Vila ba fatin akontesementu iha Aldeia Bahamori, Suku Kaikua, maibe la konsege salva sasan tanba hafoin ekipa korpu bombeiru too fatin akontesementu volume insendiu reduz ona.
“Sira kontaktu mai ami liu husi via telefone ekipa bombeiru deskola kedas ba, maibe too iha neeba ahi han hotu ona uma hela suar mak iha entaun Ekipa Bombeiru ba halo reskalu deit ona, atu nunee bele salva uma sira sorin sorin,” nia akresenta.
Nia deklara, durante Ekipa Korpu Bombeiru halo reskalu ba fatin insendiu ekipa apoiu ba vitima dezastre naturais husi Autoridade Protesaun Sivil too kedas fatin fo apoiu emerjensia, kompostu husi hahan no laos hahan ba vitima sira tuir regras Autoridade Protesaun Sivil nian ba vitima dezastre naturais sira.
Entretantu vitima hirak nee provizori, hela iha vizinhu sira nia hela fatin iha Suku Kaikua, Postu Vemasi.
Jornalista: Tomas Reis
Editora: Carme Ximenes
