BAUKAU, STLTIMORLESTE.com – Iha loron 03 Junhu 2025, komunidade uma kain hamutuk 162 iha Suku Makalaku, Postu Administrativu Kelikai, Munisipiu Baukau, asesu ona eletrisidade.
“Progresu linha eletrisidade agora daudaun fo benefisiu ba komunidade Suku Makalaku espesialmente ba Aldeia tolu iha mota sorin asesu ona eletrisidade hahu iha dia 03 Junhu nee,” informa Xefe Suku Makalaku, Estevão Salamão Martins Belo ba jornalista sira iha Vila Nova Baukau, Kinta (12/06/2025).
Nia esplika, uma kain iha Suku Makalaku neebe iha loron 03 Junhu nee asesu ona eletrisidade liu 160 neebe rejistu husi Aldeia tolu mak hanesan Aldeia Makalira, Defadae no Bosilai.
Nia argumentu, durante tinan naruk nia laran komunidade sira utiliza deit lampu tradisional no solar panel hafoin hetan naroman iha tempu kalan, tanba hela dook husi fasilidade eletrika neebe instaladu iha Suku refere.
Maibe agradese Governu, tanba inisiu tinan 2025 kontratu kompanhia lokal Montrez Frere, Unip.Lda hahu servisu harii rin eletrisidade iha loron 18 Fevereiru no kontinua ba instalasaun fiu husi rin eletrisidade ba uma komunidade termina iha loron 03 Junhu, neebe dadaun komunidade asesu ona eletrisidade.
“Tipu instalasaun ba uma kain sira kada uma kain hetan lampu rua no fo retensaun ba fulan neen hafoin monta prepagu. Hela uma kain neen mak seidauk asesu, maibe hein prosesu intalasaun segundu faze,” Estevão akresenta.
Provizoriu uma kain 162 seidauk utiliza sistema prepagu, tanba iha faze retensaun ba fulan neen, maibe inisiu tinan 2026 parte Eletrisidade Timor-Leste, empreza publiku sei monta prepagu hodi komunidade sira kontribui ba kofre estudu tuir utilizasaun enerjia eletrisidade.
Benefisiariu Estaquio Belo sente kontente no agradese, tanba inisiu Timor ukun aan too 2025 komunidade iha Aldeia Makalira, Defadae no Bosilai, foin primeira vez asesu eletrisidade iha rezidensia rasik.
“Ami sente kontente tanba asesu ona eletrisidade, no ajuda ona labarik estudunte sira bele estuda iha tempu kalan ho vontade,” Estaquio Belo espresa.
Enkuantu tuir nota informativu neebe STL asesu, tekniku inspesaun no verifikasaun gestaun projetu ho tekniku distribuisaun halo commissioning test ba transformador ho kapasidade 50kVA husi unidade rua hodi halakan enerjia eletrika ba kliente foun sira iha Suku Makalaku liu-husi implementasaun Projetu Eletrifikasaun Nasional ho distansia linha MT 5,85Kms, BT 10,72Kms transformador 50kVA unidade rua no benifisia komunidade hamutuk uma kain 162.
(tom)
