BAUKAU, STLTIMORLESTE.com – Uma kain hamutuk 23 iha Suku Uaitame, Postu Administrativu Kelikai, Munisipiu Baukau, seidauk asesu linha eletrisidade.
Informasaun nee hatoo husi Xefe Suku Uaitame, Cesaltino Freitas Perreira ba STL iha Vila Antiga Baukau, Segunda nee (18/11/2024).
“Kona-ba eletrisidade iha Suku Uaitame hau nia komunidade barak hamutuk uma kain 23 ho nia membru familia hamutuk 97 mak seidauk asesu, tanba hela dook husi linha eletrisidade,” nia dehan.
Celestino esplika, husi uma kain refere rejistu iha Aldeia Taarnu, Sialimu, Gamana no Gugulai, neebe inisiu Timor ukun aan too ohin loron seidauk asesu eletrisidade, tanba hela dook husi linha eletrisidade neebe EDTL estabelese iha Suku refere hafoin ukun aan.
Nia sublina, relasiona komunidade sira seidauk asesu eletrisidade nee, obrigatoriu tempu kalan utiliza deit lampu tradisional neebe produz husi ai-kami nia fuan hafoin hetan naroman hodi labarik estudante sira utliza ba prosesu estuda iha tempu kalan.
Tuir Celestino, utiliza lampu tradisional iha tempu kalan nee difikulta tebes komunidade sira liu-liu labarik estudante sira, tanba labele estuda ho diak no seguru, tanba lampu tradisional refere iha suar neebe fo impaktu ba ema nia matan.
Hatan ba kestaun nee, Xefe EDTL Munisipiu Baukau, Edgar da Silva hateten, ba Suku neebe asesu ona linha eletrisidade mak iha uma kain balun seidauk asesu eletrisidade, parte Autoridade Suku mak tenke esforsu rekolha dadus submete ba nasional hodi hetan apoiu solar panel, tanba atu halo instalasaun foun ba Uma kain ida presiza mos haree kustus materia.
Entretantu Munisipiu Baukau iha Suku 59 ho total Uma kain neebe asesu ona eletrisidade hamutuk 97%, iha Aldeia balun mak seidauk asesu, maibe prosesu levantamentu dadus relata ona ba nasional, iha neebe ba Aldeia balun hahu ona Loke koutasaun ba kompanhia sira kompete hodi halo instalasaun eletrisidade ba uma kain sira iha nivel Aldeia neebe seidauk asesu eletrisidade.
(EST 2)
