BAUKAU, STLTIMORLESTE.com – Uma kain hamutuk 50 resin iha Aldeia Buile Boruba’a, Suku Kaibada Makasae, Postu Administrativu Baukau Vila, Munisipiu Baukau enfrenta bee moos, tanba kanu bee moos hetan estraga husi udan.
Komunidade Elven Bento hateten, komunidade iha Aldeia Buile Boruba’a durante tempu okupasaun Indonezia asesu bee moos husi bee matan Uailia, tanba iha kanalizasaun, maibe hafoin Timor ukun aan, fasilidade sira hanesan kanu no seluk tan hetan estraga hodi difikulta komunidade sira nia nesesidade liu liu bee moos.
“Entaun husi ida nee ita nia komunidade sira balu la hetan bee balu hetan bee, entaun ami fo hanoin ba malu obrigatoriu dada poly pipe mesak konek iha Teulale nian mak tun mai ida nee mos dala ruma nafatin iha impatasaun, tanba ema balu kalsu plastiku ba kanu entaun ida nee mak sai problema ba ami too agora,”dehan Elven ba STL, iha Buile Boruba’a, Kuarta (15/10/2025).
Nia hatutan, mezmu fasilidade bee moos nian neebe instaladu iha tempu okupasaun Indonezia hetan estraga, nunee komunidade sira inisia sosa kanu poli hodi kalanilaza hikas bee husi bee matan besik Eskola Katolika ESSA Teulale nian ho distansia liu kilometru ida, maibe ema deskonhesidu nafatin estraga fasilidade sira no daudaun komunidade sira infrenta bee moos, tanba la asesu bee moos.
“Ami balu tenke buka bee too iha bee matan Uai-Isu Uai-Suma kuru bee iha neeba mak foin konsumu, ami lao kilometru ida ho balun foin too bee matan,” Elven katak.
Iha sorin seluk komunidade Alberto da Costa sente preokupadu, tanba durante tinan naruk ona komunidade Buile Boruba’a infrenta bee moos, tanba laiha kanalizasaun publiku.
“Ami iha nee susar tebes ba bee moo, ami liga bee mai maibe ema taka ho plat, nuu kulit penso feto nian nee sulan hotu ba bee entaun ami la hetan bee,” Alberto komenta.
Komunidade Buile Boruba’a nee salienta, hafoin fasilidade bee moos nian neebe estabelese iha tempu okupasaun Indonezia hetan estragus, sira inisiativa sosa rasik kanu poli kor metan hodi kanaliza rasik bee moos ba sira nia hela fatin, maibe ema deskonhesidu sira kontinua estragus no taka bee ba sira.
Nunee tinan naruk ona komunidade Buile Boruba’a Infrenta bee moos, tanba nee husu parte relevante hanesan Bee Timor Leste halo kanalizasaun bee ba komunidade sira iha Aldeia Buile Boruba’a.
Mezmu preokupasaun komunidade sira nian nunee, maibe parte Bee Timor Leste daudaun esforsu ona halo ona kanalizasaun bee no tempu besik komunidade sira iha aldeia Buile Boruba’a sei asesu hikas bee moos.
Jornalista: Tomas Reis
Editora: Carme Ximenes
