BAUKAU, STLTIMORLESTE.com – Uma kain hamutuk 50% iha Suku Letemumu, Postu Administrativu Kelikai, Munisipiu Baukau, seidauk asesu bee moos husi SAS.
Deklartasaun nee hatoo husi Xefe Suku Letemumu, João Soares Correia ba jornalista sira iha Letemumu, Kinta (07/11/2024).
“Hau konsidera ba Aldeia neebe iha Suku Letemumu iha Aldeia 5 komunidade 50% seidauk asesu bee moos,” dehan nia.
Nia esplika, Suku Letemumu iha numeru uma kain barak, neebe rejistu husi Aldeia 5 hanesan Laumana, Manume, Lebenei, Waidora no Ruta, maibe uma kain sira husi Aldeia 2 hanesan Ruta no Lebenei seidauk asesu bee moos, tanba seidauk hetan kanalizasaun husi parte relevante.
Nia sublina, komunidade husi Aldeia 2 refere la asesu bee moos dezde husi tempu okupasaun, maibe nesesidade obriga tenke lao ain ho distansia neebe dook kuaze besik km 4 foin asesu bee, tanba kuru kedas iha Suku Vizinhu sira hanesan Lakuliu, Baguia inklui Makalaku.
“Ita koalia kona-ba bee moos nee nesesidade baziku ida neebe importante, maibe tanba deit moris ita lao, maibe ami tau ona ba ajenda hodi hein ba orsamentu PNDS nian neebe mai, liu-liu ba Aldeia Ruta no Lebenei neebe seidauk asesu bee moos,” nia akresenta.
Entretantu total populasaun iha Suku Letemumu hamutuk 13.949 rejistu husi Xefe Familia hamutuk 1.429.
(EST 2)
