DILI, STLTIMORLESTE.com – Komunidade uma kain neen (6) neebe agora daudaun hela iha areador Eskola Sekundáriu Jeral nu. 4 Setembru Balide, sira prontu atu hamamuk fatin refere.
Asuntu nee hatoo husi Diretor Eskola Sekundáriu Jeral nu. 4 Setembru Balide, Sergio A. da Cruz ba jornalista STL iha nia knaar fatin Balide, Kuarta nee (25/06/2025).
“Ita nian komunidade neebe mak hela iha areador eskola ida nee seidauk hetan karta notifikasaun, ita nian komunidade uma kain neen (6) mak agora daudaun hela iha areador eskola ida nee, too agora husi Ministeriu seidauk mai, maibe husi SEATOU mak mai ona iha ami nian eskola, nomos husi Munisipiu Dili nian mak mai ona,” dehan nia.
Sergio dehan, parte eskola sempre koopera diak ho komunidade sira nee, tanba sira mos koopera diak ho eskola, sira hatoo mai prontu atu koopera ho governu, sira prontu atu hamamuk fatin areador eskola, maibe sira husu governu se bele hanoin fo netik apoiu hanesan kalen ba sira, tanba sira sempre koopera ho governu.
“Ami husi parte eskola nian mos nafatin husu ba sira para bele koopera ho ita nian governu, no koopera ho ami husi parte eskola nian,” nia esplika.
Iha fatin seluk, Diretor EBC 10 Dezembru Komoro, Calistro A. Guterres afirma, agora daudaun sira sei iha nee, maibe ho karta notifikasaun nee too 19 Junhu nee tenke hamamuk ona espasu eskola nee, komunidade uma kain 13 mak simu ona Karta notifikasaun, maibe iha mos informasaun husi ensinu sekundariu katak, notifikasaun segundu komunidade sira simu husi Ministeriu Justisa liu husi Terras Propriedades, dala barak komunidade sira konfundi katak notifikasaun ida neebe mak los no la los, notifikasaun husi Ministeriu Justisa nian mos fo loron 30, nee hatun iha loron 9 Junhu too loron 9 Julhu.
“Dadus ita nia komunidade hela iha areador eskola nee ita foti ona, iha fulan Marsu tinan nee no iha fulan Abril halo enkontru ho komunidade sira neebe okupa eskola, depois iha fulan Maiu notifikasaun primeiru husi Prezidente Autoridade Munisipiu Dili liu husi Edukasaun Munisipiu Dili, tanba eskola nee pertensia Edukasaun Munisipiu Dili nian, entrega ba EBC no Ensinu Sekundariu kontinua distribui ba komunidade sira. Nee duni husi Autoridade Munisipiu Dili hahu husi loron Maiu notifikasaun tun loron 30 too 19 termina ona hamamuk fatin,” katak nia.
(jac)
