DILI, STLTIMORLESTE.com – Familia uma kain neen (6) neebe daudaun nee hela iha areador Eskola Sekundariu nu. 4 Setembru Balide prontu koopera ho Ministeriu Edukasaun (ME) no eskola, hodi bele sai husi eskola refere.
“Momentu nee husi parte SEATOU nomos husi parte Munisipiu ninia koalia tiha ona ho ita nian komunidade sira no hau rasik mos koalia hela ho sira, maibe ita nian komunidade sira nee prontu atu koopera, katak bainhira deit mak karta bele too iha sira nian liman, entaun sira bele ses aan ona, tanba sira prontu koopera ho ME no eskola,” dehan Diretor ESJ nu. 4 Setembru Balide, Sergio A. da Cruzba STL, Tersa nee (22/04/2025).
Sergio afirma, daudaun nee komunidade uma kain 6 mak hela iha areador ESJ nu. 4 Setembru, entre uma kain 6 nee, hanesan sira hela uma kain ida ou rua iha uma ida, nuudar Diretor Eskola rekolha viza familia no eleitoral mos hau rekolha hela husi komunidade sira.
“Hau hanoin bainhira ita nian komunidade hela iha areador eskola nian, nee sempre akontese no prejudika tebes ba ensinu aprendizajen husi profesor sira, labarik sira lao ba mai iha turma oin, labarik sira duni malu, dala ruma eskola seidauk sai labarik sira ba joga ona iha kampu laran, maibe ida nee hau ho adjuntu rasik hasai hanoin ida hodi halo enkontru ho sira,” tenik nia.
Iha parte seluk, Diretor Eskola Baziku Sentral (EBC – sigla português) 10 Dezembru Komoro, Calistro A. Guterres hatete, okupantes husi EBC 10 Dezembru Komoro hamutuk uma kain 13, prontu koopera no sira hein karta notifikasaun.
“Okupantes foin daudaun iha 21 Marsu Autoridade Munisipiu Dili ho ekipa boot ida inklui nível Edukasaun Nasional, Munisipal sira mai hotu ona enkontru ho Xefe Suku no Xefe Aldeia sira ho komunidade sira aseita ho saida mak autoridade fo ba sira, katak primeiru sei halo identifikasaun ba komunidade sira neebe hela iha eskola laran, identifikasaun halo hotu tiha ona, dadus hatama hotu tiha ona,” nia haktuir.
Entretantu Sekretariu Estadu Ensinu Sekundariu Jeral no Ensinu Tekniku Vokasional, Domingos Lopes Lemos hatete, antes nee dehan relasiona ho komunidade hirak neebe mak sei okupa areador eskola iha kapital Dili, Ministeriu Edukasaun (ME) koordena nafatin ho Diretor Servisu Edukasaun Munisipiu Dili.
(jac)
