BAUKAU, STLTIMORLESTE.com – Komunidade uma kain hamutuk 60 resin iha Aldeia Uaiharebo’o, Suku Uatulari, Postu Administrativu Vemasi, Munisipiu Baukau, obrigatoriu evakua ba Vemasi Vila, tanba durante nee la asesu linha eletrisidade.
Xefe Suku Uatulari, Venancio da Costa esplika, Suku Uatulari iha Aldeia tolu, Aldeia rua asesu ona linha eletrisidade, maibe Aldeia Uaiharebo’o rejistu xefe familia hamutuk 93 ho membru familia nain 444 too ohin loron seidauk asesu enerjia husi linha eletrisidade neebe Ministeriu Obras Publikas liu husi Dirasaun Eletrisidade Timor Leste instala iha Suku refere, nunee obriga komunidade uma kain 60 resin daudaun nee evakua ba Vemasi Vila.
“Uma kain 93 iha Aldeia Uaiharebo’o nee seidauk asesu eletrisidade, ho razaun ida nee mak komunidade uma kain 60 resin tur ba hela fali iha Vemasi Vila, tanba sira atu estuda,” hateten Venancio da Costa ba STL iha Vila Antiga Baukau, Kinta (26/06/2025).
Nia sublina, durante nee komunidade Uaiharebo’o utiliza deit lampu tradisional iha tempu kalan hafoin labarik estudante sira asesu estuda iha tempu kalan.
Nia fundamenta, Aldeia Uaiharebo’o rasik iha eskola Ensinu Baziku Katolika neebe apoiu konstrusaun husi Padre Locateli hodi fasilita estudante sira husi Xefe familia 93, maibe kestaun la asesu linha eletrisidade difikuldade labarik estudante sira nia estuda iha tempu kalan, obrigatoriu uma kain 63 deside ba hela iha Vemasi Vila, nunee oan sira asesu eletrisidade fasil estuda iha tempu kalan.
“Ami iha eskola ida, maibe sira tuun hotu Vila tan deit eletrisidade, agora alunus hela iha neeba nain 10 resin deit ona, maibe profesores mantein nafatin hanorin,” Venancio akresenta.
Xefe Suku Uatulari nee deklara, daudaun komunidade hela iha Aldeia Uaiharebo’o ho xefe familia 30 neebe iha deit labarik estudante nain 10 resin ativu iha eskola Katolika Uaiharebo’o.
Venancio katak, preokupasaun refere antes nee hatoo ona ba parte relevante, maibe too ohin loron seidauk responde, tanba nee kontinua husu ba parte relevante sira tau atensaun ba asuntu nee no evita komunidade lao ses husi Aldeia refere.
Tanba daudaun akontese iha Uaiharebo’o komunidade sira deskola ba hela fali iha Vemasi Vila ho razaun tan deit seidauk asesu linha eletrisidade.
Entretantu Suku Uatulari iha Aldeia tolu mak hanesan Aldeia Uaiharebo’o, Bahalala no Aldeia Naulale ho total populasaun 1.623 husi Xefe familia 345 maioria moris ho agrukultura.
(tom)
