BAUKAU, STLTIMORLESTE.com – Uma komunidade hamutuk 15 iha Suku Fuiluro, Postu Administrativu Lospalos, Munisipiu Lautem, afeta ba inundasaun.
Komadante Operasaun Autoridade Protesaun Sivil (APC – sigla português) Munisipiu Lautem, José Agostinho da Costa esplika, inundasaun refere akontese kauza husi udan intensidade forte natoon iha Munisipiu Lautem, hahu kedas iha loron 11 too 12 Junhu tinan nee, neebe valeta sira kuaze akumula udan been ho volume boot, maibe kauza husi intupidu iha ponte provoka bee sulin tama komunidade nia uma.
“Husi ami nia observasaun kuaze uma kain pur-volta 15, kauza husi udan halo inundasaun mais laiha estragus ba uma,” hateten José Agostinho da Costa ba jornalista STL liu husi telefone, Sesta (13/06/2026).
Nia sublina, durante komunidade sira afeta inundasaun, ekipa Autoridade Protesaun Sivil Lautem too kedas fatin hodi rekolha informasaun, maibe la rezulta uma no sasan hetan estragus, tanba liu husi sukat bee sae ho kondisaun natoon.
Maibe durante inundasaun afeta ba sidadaun nain haat kompostu idoza nain rua no bebe ho inan, tanba labele sai husi uma laran, maibe ekipa APC konsege evakua ho kondisaun diak.
“Hamutuk nain haat mak ami lori sai, komu familia sira la aseita ami lori mai APC nian no APC observa vitima sira kondisaun diak,” José akresenta.
Nia relata, aleinde komunidade uma kain 15 iha Fuiluro afeta ba inundasaun, uma kain balun iha area Mainha 1 Lautem afeta mos inundasaun, maibe bainhira APC konfirma Autoridade Suku la relata dadus.
Nunee Komandante APC Lautem nee informa tuir previsaun tempu neebe hatudu udan kontinua akontese, tanba nee husu komunidade sira atu kuida oan sira halimar iha udan laran no halo movimentasaun iha tempu udan, tanba insidente la espera.
(tom)
