BAUKAU, STLTIMORLESTE.com – Uma komunidade hamutuk 911 iha Munisipiu Baukau hetan estraga, tanba afeta husi dezastre naturais.
Tuir lista ofisial neebe jornalista STL asesu husi Diresaun Servisu Autoridade Protesaun Sivil (APC) Munisipiu Baukau katak, uma komunidade hamutuk 911 nee, APC rejistu husi fulan Janeiru too Dezembru iha Postu Administrativu Baukau Vila hamutuk 92, Baguia 80, Laga 151, Kelikai 504, Venilale 73 no Vemasi 11.
Husi numeru 911 nee, APC elabora ona husi fulan Janeiru too Novembru la inklui fulan Dezembru, iha Postu Administrativu sira tuir kategoria dezastre naturais nian hanesan estraga husi anin boot hamutuk 641, afeta ba insendiu 51, impaktu husi rai halai 23, afeta inundasaun 101 no seluk tan 13 neebe konklui hamutuk 829.
Husi kategoria estraga sira hamutuk 829 neebe APC elebora kompostu uma hela fatin, uma lisan, kios, dapur, armajen no seluk tan, maibe parte APC foku liu ba uma hela fatin, tanba tuir regras, nunee verifika ona uma hela fatin 311 atu hetan material rekuperasaun, maibe foin relata deit dadus 76 ba nasional no 235 sei suspende, tanba parte vitima seidauk kompleta dadus.
Mezmu dezastre naturais 2024 APC Baukau seidauk inklui ho fulan Dezembru nian, maibe kona-ba verifikasaun no apoiu emerjensia kuaze uma kain 911 neebe APC rejistu hetan apoiu hanesan.
“Ami husu ba komunidade tomak atu prevene aan iha tempu udan nee, neebe sira neebe hela besik iha mota ninin, foho lolon, tasi ibun atu kuidadu aan, tanba bele afeta ba ita nia vida,” hatete Komandante Operasaun APC Baukau, Fransisco Viana Freitas ba jornalista sira iha knaar fatin Tirilolo, Kuarta (08/01/2025).
Nia husu komunidade sira, liu-liu halo uma iha foho lolon sira atu nafatin kuda ai oan hodi proteje rai labele monu (rai halai) nomos iha tasi ibun, mota ninin atu nafatin kuidadu aan iha tempu udan nee, tanba tuir previzaun tempu udan sei akontese nafatin bele hamosu inundasaun boot.
Tanba nee husu komunidade sira neebe utiliza sunu ai matan iha dapur laran kuidadu bainhira sai husi dapur laran lao dook tenke kontrola ai matan, tanba bele impaktu hamosu insendiu no tau matan ba instalasaun fiu eletrisidade sira, tanba bainhira fiu laiha kualidade bele hamosu sirkuitu hodi afeta ba insendiu.
Razaun avizu hirak nee nia katak, tanba inisiu fulan Janeiru 2025 nee rejistu dahuluk vitima dezastre hamutuk 12, neebe iha uma 2 afeta insendiu iha Postu Venilale too mutuk la konsege salva sasan uma laran, tanba kauza husi sirkuitu instalasaun fiu eletrisidade neebe ai lakan husi uma laran.
No uma 4 iha Aldeia Betulale, Suku Vemasi Tasi, Postu Vemasi afeta inundasaun, tanba besik liu mota neebe kuaze husi udan boot neebe liu oras 2 rezulta sasan uma laran hetan estragus enkuantu uma restu seluk estragus husi anin boot. Husi uma hirak nee APC Baukau remata ona fo apoiu emerjensia no 3 hetan verifikasaun tanba estragus grave.
(EST 2)
