DILI, STLTIMORLESTE.com — Uma lubuk ida neebe komunidade sira halo iha tasi ibun area Metiaut nian hahu husi Ponte Habibie too Kristu Rei, sai afetadu ba alargamentu estrada neebe governu planea ona atu realiza iha tempu badak.
Governu liuhusi Ministeriu Obras Publika (MOP) iha dia 2 Fevereiru 2026 liuba aprezenta ona ba Primeiru Ministru (PM) Kay Rala Xanana Gusmão kona-ba planu alargamentu estrada husi Ponte Habibie ba Kristu Rei.
Governu liuhusi empreza sira tau hahu sinal ba uma komunidade nian iha area Metiaut hahu Ponte Habibie too Kristu Rei, nunee iha tempu badak sei bele hamamuk hodi fo espasu ba kompania neebe hetan kontratu ho governu atu bele ezekuta ona obra nee tuir planu.
Maske uma hirak nee tau sinal ho tinta mean no numeru afetadu desde tinan kotuk liu ba, alargamentu estrada husi Ponte Habibie ba Kristu Rei sei iha hela prosesu no seidauk final atu hahu implementa.
Governu iha ona seriedade atu dezenvolve Kristu Rei sai fatin turismu relijioza neebe atraktivu tantu ba turista lokal no internasional.
Dezenvolvimentu Kristu Rei sei hasae rendimentu ba estadu liuhusi turismu no sei fo benefisiu direta no indireta ba povu no nasaun.
Planu Ministru Obras Publiku (MOP), Samuel Marcal nian ba obra alargamentu estrada husi Ponte Habiebie ba Kristu Rei hetan ona apresiasaun husi PM Xanana, tanba obra nee sei apoiu turismu iha Kristu Rei nuudar area turistika ida iha kapital nasaun no sei rezolve mos problema drainajen sira iha parte area neeba hodi prevene inundasaun iha tempu udan.
Instrasaun, iluminasaun estrada no sinalizasaun nee ho espektasaun atu lori benefisiu ba longu prazu, hafasil komunidade asesu ba fatin turismu Kristu Rei ho viajen neebe mais rapida ka lais, seguru no konfortavel no haforsa dezenvolvimentu ekonomia lokal.
Dezenvolvimentu area Kristu Rei hasae fo benefisiu ba povu no nasaun, Kristu Rei sei sai fatin distinadu tantu ba turista lokal no internasional no sei kontribui mos reseita neebe signifikante ba kofre estadu.
Estrada husi Ponte Habibie ba Kristu Rei, iha duni nesesidade atu hadia ka reabilita, tanba kondisaun estrada ho espasu neebe klot, balu hahu kuak, nakfera, pozisaun estrada anivel ona ho rai kauza ba penyusutan ka escolhamentu tanba utiliza iha tempu naruk nia laran laiha reabilitasaun.
Tuir Agapito Inacio da Costa, estrada iha area Metiaut oras nee aat grave hodi difikulta movimentu transporte publiku no pribadu, estrada iha pontu balu risku ba movimentu, tanba kuak, balu pozisaun estrada hanesan tiha ona rai no balu tun liu, kuandu udan hamosu inudasaun neebe fo risku motorista sira neebe halo viajen.
“Tempu udan ita lao ho motor liuhusi area metiaut nian ladun sente seguru, tanba estrada bee taka metin, ema ho kareta lansadu bee sae hotu ita nia leten, kuandu tama sala kuak ruma, atrapalha los. Neebe agradese kuandu governu atu halo alargamentu ba estrada husi ponte Habiebie mai too Kristu Rei,” dehan Agapito ba STL iha area Kristu Rei foin lalais nee.
Nia hatete area Kristu Rei ba Dolok Oan agora furak tebes, estrada tama ona, estrada husi Kristu Rei, lakleur tan sei borus estrada husi diresaun hera nian, kuandu governu reabilita ka alargamentu estrada area Metiaut nian sei fasilita diak liu komunidade neebe halo viajen ba pasa tempu tantu mesak, familia ka grupu iha Kristu Rei.
Nunee Moses da Silva hanesan vendedor Nuu Lecidere apoiu tebes planu governu atu halo alargamentu estrada husi Ponte Habiebie ba Kristu Rei, tanba Kristu Rei fatin turismu neebe governu komesa dezenvolve atu destinasaun ba turista rai laran no rai liur.
“Ami apoiu atu haree ita nasaun nee sai sidade, laos kapital nasaun deit, maibe sidade nee lori too kristu Rei, nee fatin turismu ida konhesidu iha kapital Dili, neebe tenke hadia estrada sira, kria kondisaun ba ema sira halo viajen ho seguru,” dehan Moses.
Area Kristu Rei tuir nia presiza monta mos seguransa premanente hodi asegura komunidade sira neebe pasa tempu ho familia iha neeba tantu kalan ka loron no asegura area Kristu Rei husi atividade sira neebe lamerese.
“Seguransa nee atu hare buat barak, Kristu Rei nee fatin sagradu, joven sira balu mai ho namora, tuur too kalan boot, balu mai hemu tua kalan too loron, nee presiza fo atensaun,” nia tenik.
(god)
