DILI, STLTIMORLESTE.com – Programa Nasaun Unidas ba Dezenvolvimentu (PNUD) liu husi reprezentante iha Timor Leste (TL), Katyna Argueta introdus ba Primeiru Ministru (PM), Kay Rala Xanana Gusmão kona-ba programa prioridade sira neebe iha ligasaun ho programa IX Governu Konstitusional, neebe atu implementa iha TL.
Atualizasaun nee liu husi enkontru formal neebe halao iha Palasiu Governu, Dili, Kinta (23/01/2025).
“Enkontru interesante tebes ho Primeiru Ministru, ami koalia kona-ba prioridade sira neebe Timor Leste iha liga ho dezenvolvimentu. UNDP hahu nia siklu planeamentu foun liga ho programa prioridade sira Governu nian”, dehan Katyna Argueta.
Iha enkontru nee, Xefe Governu mos atualiza programa IX Governu Konstitusional nian neebe kobre prioridade sira too area rural.
UNDP mak Ajensia Nasaun Unidas nian neebe aborda kona-ba dezenvolvimentu ho nia projetu sira iha setor prinsipal tolu mak hanesan apoia programa desentralizasaun, apoia dezenvolve Balkaun Úniku, no apoia foinsae sira atu partisipa ativu liu tan iha publiku.
Setor seluk neebe UNDP apoia mak proteze ambiente, responde ba mudansa klimatika, sustentabilidade no reziliensia.
(gui)
