DILI, STLTIMORLESTE.com – Fundu Populasaun Nasaun Unidas (UNFPA) hamutuk ho Minsiteriu Saude (MS) fo kapasitasaun no formasaun ba profisional saude sira husi Hospital Nasionál Guido Valadares (HNGV), no hospital rejional sira kona-ba vizilansia no resposta ba mortalidade maternal no perinatal ka maternal and perinatal death surveillance and response (MPDSR).
“Ohin momentu ksolok boot tebes mai hau partisipa iha abertura ba kapasitasaun no formasaun atualizasaun ba fasilitadór sira kona-ba MPDSR durante loron 6. Ho programa MPDSR iha TL, ida nee reprezenta esforsu koletivu no parseria hodi hametin sistema saúde iha rai laran,” hatete Reprezentante UNFPA iha Timor Leste, Bruce Campbell liu husi diskursu iha Novu Turizmu, Segunda (21/10/2024).
Nia dehan, dezde inísiu tinan 10 liu bá iha 2014 ho estabelesimentu sistema vizilansia no resposta ba MPDSR, kolaborasaun ida nee habelar ona ba munisípiu hotu-hotu, tanba apoiu husi MS, UNFPA, OMS no UNICEF.
Nia hein katak, formasaun ida nee sei fo kbiit ba ita boot sira atu hametin liu tan komisaun sira nee , liu-liu bainhira sira identifika pasu konkretu no asionável tuir mai ba kada mate inan no perinatal neebe identifika ona.
Iha fatin hanesan, Xefe Departamentu Saude Materna Infantil iha Ministeriu Saude (MS), Lucia Lay hateten, treinamentu MPDSR neebe halao iha semana ida nee sei foka ba refreska partisipante sira ho mata dalan treinamentu neebe atualizadu.
“Treinamentu MPDSR neebe ami halao iha semana ida nee sei foka ba refreska partisipante sira ho mata dalan treinamentu neebe atualizadu. Ami hakarak atu fo formasaun ba partisipante sira husi nivel nasional no munisípiu sira hodi kria grupu formador sira nian hodi prepara ba espansaun liu tan ba hospitál no munisípiu sira seluk,” nia deklara.
Nia agradese ba Gabinete Rejional no Gabinete País UNFPA nian ba sira nia apoiu hodi organiza formasaun ida nee nomos ba Governu Australia nia kontribuisaun sira liu husi Gabinete Rejionál no Gabinete País UNFPA nian neebe apoia programa MPDSR liu husi formasaun orientasaun neebe mak iha liu husi monitorizasaun no supervizaun sira.
(jen)
