LAUTEM, STLTIMORLESTE.com – United Nations Population Fund (UNFPA) servisu hamutuk ho Ministeriu Saude lansa ka inaugura fatin seguru ba feto no labarik feto sira, neebe hetan violensia iha Munisipiu Lautem.
Reprezentamte Interinus UNFPA, Domingas Bernardo hatete, UNFPA nakonu ho agradesimentu no esperasan boot, tanba bele hamutuk ho Ministeriu Saude (MS) lansa ona fatin Seguru iha Sentru Saude Internamentu Lospalos iha Munisipiu Lautem.
“Agradese tebes, tanba ohin loron ita lansa ona fatin seguru iha Sentru Saude Internamentu Lospalos nee marka istroria ida tan, nee esforsu koletivu ita hotu nia,” hatete Domingas ba jornalista sira, iha fatin Kultura Lospalos, Segunda (23/12/2024).
Nia dehan, UNFPA inaugura fatin seguru ba dala ualu (8) atu fo atendimentu ba ema neebe hetan Violensia Bazeia ba Jeneru (VBJ) nian iha Munisipiu Lautem.
“Ami lansa fatin seguru nee iha Munisípiu Kovalima, Baukau, Dili, tolu iha Atabae, Vikeke, Gleno, Likisa, hamutuk Lospalos nian ualu (8),” nia esplika.
Nia tenik, UNFPA nia kompromisu determinasaun ho vizaun ida katak tenke elimina Violensia Bazeia ba Jeneru, no sira luta hodi kria espasu seguru ba feto no inan feto sira, apoiu fasilidade saude neebe ho kondisaun diak hodi prevene no responde ba VJB.
Iha fatin hanesan, Diretora Jeral Kuidadus Saude Primária, Elizabeth Leto Mau dekalra, UNFPA servisu hamutuk ho Ministeriu Saude (MS) estabelese fatin Seguru iha Munisipiu sira inklui Munisipiu Lautem iha Sentru Saude Internamentu Lospalos.
Maibe Violensia Bazeia ba Jeneru (VBJ) asuntu ka problema saude publika no kontinua sai violasaun komum ba problema direitus umanus iha Timor Leste.
Tanba prevalensia violensia kontra feto no labarik feto tuir peskiza Demográfika Saude Timor Leste iha tinan 2016 hatudu katak 38% husi feto ho idade 15-49 sofre ona violénsia fíziku.
(jen)
