KOVALIMA, STLTIMORLESTE.com – United Nations Population Fund (UNFPA) hamutuk ho Ministeriu Saude (MS) inaugura Fatin Seguru, hodi entrega ba Sentru Saude Tilomar uza ba atendimentu ba feto no labarik neebe hetan Violensia Bazeia ba Jeneru, liu-liu ba ema ho sobreviventes sira neebe peresiza.
Diretora Jeral Kuidadu Saúde Primária, Elisabeth Leto Mau hatete, Ministeriu Saude (MS) kontente tebes bele partisipa iha inaugurasaun Fatin Seguru neebe mak harii iha Sentru Saude Komunitáriu Tilomar, Munisípiu Covalima, neebe mak halo ba dala hitu.
“Hau kontente tebes bele partisipa iha eventu inaugurasaun Fatin Seguru ida nee, bele estabelese tan iha Sentru Saude Komunitária Tilomar, Munisipíu Kovalima, ho inagurasaun Fatin Seguru ida nee ba dala hitu (7) no ida nee hanesan marka istóriku importante ida tan husi ita nia esforsus atu kontínua hametin kapasidade setor saude hodi responde ba kazu Violensia Bazeia ba Jeneru iha Timor Leste, partikularmente iha Munisipiu Kovalima,” hatete Diretora Jeral Kuidadu Saúde Primária, Elisabeth Leto Mau liu husi nia diskursu, wainhira inaugura fatin segura iha Sentru Saude Tilomar, Segunda( 09/12/2024).
Nia dehan, dezde iha tinan 2022 mai too tinan 2024, Ministériu Saúde ho parseiru sira inaugura ona fatin Seguru hamutuk neen iha munisípiu neen.
“Ita inaugura ona Fatin Seguru hamutuk neen (6) iha munisipiu Vikeke, Ermera, Bobonaro, Likisa, Dili no Baukau ne’ebe hetan apoiu tekniku husi UNFPA. No ohin ita inaugura tan Fatin Seguru foun iha Sentru Saude Tilomar, liu husi projetu hamutuk ba Igualidade neebe finansiadu husi KOICA Projeitu kobre Munisipiu Dili, Baukau, Kovalima no RAEOA,” dehan nia.
Nia hatutan, hanesan ema hotu hatene katak Violénsia Bazeia ba Jeneru sai ona hanesan assuntu ka problema saude publika.
Tanba iha Munisípiu Kovalima 51% husi feto no inan feto neebe mak esperiensia ba Violensia fizika ka seksual ho emosional hahu kedas iha tinan 15.
Iha fatin hanesan, Reprezentante Interina UNFPA ilha Timor Leste, Domingas Bernardo hatete, UNFPA hamutuk Ministeriu Saude (MS) hodi inaugura Fatin Seguru ba Sobrevivente sira bazeia ba Violensia Bazeia ba Jeneru nian iha Sentru Saude Tilomar (SST).
“Wainhira ita lansa Fatin Seguru ita marka istroria ida tan ba esforsu koletivus, laos ba ema ida rua deit, maibe ba ita hotu-hotu nia responsabilidade,” dehan Domingas.
(jen)
