DILI, STLTIMORLESTE.com – United Nations Children Fund hamutuk ho Instituto Para a defesa dos Direitos da Crianca (INDDICA) Organiza Espozisaun Foto hodi Komemora Loron Mundial Labarik.
Loron 20 Novembru 2024 hanesan parte komemorasaun Loron Mundial Labarik ba tinan ida nee, UNICEF no INDDICA apoiu husi Timor Plaza organiza espozisaun fotografia ba labarik sira, ho tema “Rona ba Futuru”.
Iha biban nee, Prezidente Republika Jose Ramos Horta liu husi diskursu iha Timor Plaza Kuarta kalan (20/11/2024) hatoo parabens ba labarik Kiik sira neebe hasai fotografia kapas.
“Parabens, hau haree labarik nee nia fotografia barak iha nee kapaas los tenke manan premiu ida, depois imi bele halo fotografia nee, depois husu ba UNICEF neebe tau matan ba labarik nomos INDDICA fo lista imi sira hasai foto nee fo sira nia naran para hau haree hodi fo premiu ida ba imi,” katak PR Horta.
Xefe Estadu hatete, labarik sira hasai fotografia diak hotu, no labarik sira nia foto diak liu PM Xanana nia no Prezidente nia.
“Hau sei hatete ba Avo Nana imi mai haree tok imi nia foto nee nia sei hakfodak, nia sei laran moras imi nia foto diak liu Avo Nana no diak liu mos hau nia,” katak PR.
Fotografia tolu nulu resin lima (35) husi labarik nain 16 ho idade tinan 14-18, hatudu labarik sira nia hanoin kona-ba progresu balun husi direitu labarik nian iha Timor Leste, no atu hatoo sira-nia preokupasaun kona-ba asuntu balu neebe difikulta sira atu goza sira nia direitu sira. Liu husi espozisaun, labarik sira halo liu tan apelu ida ba adultu sira iha Governu, iha komunidade no iha uma atu ajuda rezolve kestaun sira hanesan trabalhu infantil no poluisaun.
Fotografia sira dezenvolve hafoin workshop semana ida, neebe fotografu profisional Bernardino Soares, ekipa labarik sira ho abilidade sira atu uza fotografia hodi hasae konsiensia ativamente kona-ba labarik sira nia direitu.
Reprezentante UNICEF, Patrizia DiGiovanni hatete, fotografia neebe mak iha hatudu talentu imajinasaun husi labarik sira.
“Fotografia sira neeebe mak hatudu talentu, imajinasaun no kriatividade neebe mak ami nia oan sira iha.
Fotografia sira mos sai hanesan lembransa ida ba parte interesada sira atu haree didiak no rezolve ho urjente obstákulu barak neebe impede labarik sira atu goza direitu baziku sira hanesan direitu ba edukasaun, direitu ba ambiente neebe moos no seguru no direitu atu halimar no sai labarik,” dehan Patrizia DiGiovanni, Reprezentante UNICEF.
Dezde 1989, Loron Mundiál Labarik selebra globalmente iha loron 20 Novembru hodi marka aniversáriu husi loron ne’ebé líder mundiál sira adota konvensaun kona-ba Direitu Labarik iha tinan 1989.
Loron nee aprezenta oportunidade ida atu destaka kestaun kritiku sira neebe afeta labarik sira nia moris no apoia envolvimentu labarik sira nian nu’udar defensor ba sira nia direitu rasik.
Atu koinside ho komemorasaun sira tinan ida nee nian, UNICEF fo sai relatoriu global ida kona-ba Estatu Labarik sira nian iha Mundu 2024: Futuru Infansia nian iha Mundu ida neebe ho Mudansa, neebe fo sai forsa global boot sira neebe fo impaktu ba labarik sira nia moris, agora no iha futuru. Forsa global boot sira nee mak mudansa demografika neebe lalais, krize klimatika no ambiental sira, no teknolojia sira neebe avansadu.
Relatoriu nee detalhu katak, iha tinan 2050 forsa global tolu nee iha impaktu pozitivu no negativu neebe signifikativu ba labarik sira no sira nia moris. Hanesan ezemplu, relatoriu nee hatete katak too 2050-2059, labarik barak liu dala ualu sei hetan espozisaun ba laloran manas makaas, dala tolu liu ba inundasaun mota nian neebe makaas, no kuaze dala rua liu ba insendiu ai laran neebe makaas, kompara ho tinan 2000.
(eme)
