DILI, STLTIMORLESTE.com – Uniforme eskola ka farda eskola iha eskola balun hahu lao daudaun ona, maske balun mak seidauk.
Lia hirak nee hatoo husi Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos ba jornalista sira iha edifisiu Komisaun Funsaun Publika, Segunda nee (19/05/2025).
“Kona-ba ita nian uniforme eskola nee, hau hanoin ita nian eskola balun lao daudaun ona, tanba nee ita nian eskola balun hahu daudaun ona uniforme eskolar iha sira nian eskola, maske balun mak seidauk,” dehan nia.
Iha fatin seluk, Diretor EBC Fatumeta, Cornelio Sequeira dos Santos dehan, estudantes hodi koalia kona-ba uniforme eskola no daudaun nee hein inan aman lori osan ba eskola para bele suku ona farda.
“Kona-ba uniforme eskola nian iha Sabadu foin daudaun ami halao ona enkontru ho inan aman estudantes, tanba bazeia ba sirkulasaun neebe Ministeriu Edukasaun katak, eskola bele halao enkontru ho inan aman, atu nunee inan aman sira bele servisu hamutuk ho eskola, ho nunee eskola bele pesan farda, hodi inan aman sira bele sosa farda oan sira, nee duni hein inan aman sira lori osan mai para selu farda nee, nunee osan nee kompletu tiha mak ita foin pesan farda nee,” dehan nia.
Nia dehan, enkontru ho inan aman hotu ona iha Sabadu semana kotuk nee, iha enkontru laiha inan aman mak kestiona kona-ba uniforme nee, tanba sira konkorda sosa farda nee, tanba ida nee diak ba oan sira no inan aman sira hakarak tenke iha duni farda ba sira nian oan, eskola ida tenke iha duni farda, nee duni inan aman sira aseita lori osan mai para suku farda nee.
“Ninia kustu ba farda nee mak hanesan kaos ho kalsa nee hamutuk US$ 11, farda nasional nee US$14, tanba husi Ministeriu Edukasaun fo hatene katak labele husu osan liu US$ 20, agora ami buka meus ba kompanhia neebe bele servisu hamutuk ho ami,” dehan nia.
(jac)
