DILI, STLTIMORLESTE.com – Universidade pribadu tolu (3) husi Bali (Indonezia) kompostu husi Institutu Turizmu no Negósiu Internasionál, Universidade Internasional Bali no Wira Medika Bali College of Health Sciences (STIKES) asina Memorandum of Understanding (MoU) ho universidade pribadu sira iha Timor Leste hanesan, Instituto Superior Dom Bosco, Instituto Superior Cristal no Instituto Politekniku Betano, inklui asina MoU ho Centru Kultura Indonezia (PBI) iha Dili.
Serimonia asina MoU entre universidade pribadu tolu husi Bali ho universidade pribadu sira iha Timor Leste halao iha Edifisiu PBI Dili, Kuarta (11/6/2025).
Asina MoU nee halao husi Reitor Institutu Turizmu no Negósiu Internasionál, I Made Sudjana, SE, MM, Reitor Universidade Bali Internasional, Prof. Dr. dr. I Made Bakta, Sp. PD-KHOM, Xefe Wira Medika Bali College of Health Sciences (STIKES), Drs. I Dewa Agung Ketut Sudarsana, MM, Xefe Bali Internasional University, Julang Aryowiloto ho Reitor Instituto Superior Cristal (ISC), Dr. Sebastiao Pereira, Prezidente Instituto Politekniku Betano, Prof. Assoc. Adj.Acasio Cardoso Amaral, Ph.D no Instituto Superior Dom Bosco, Pe. Agnelo Eduardo Jeronimo Moreira, SS. Alein de nee, Xefe Wira Medika Bali College of Health Sciences, Drs. I Dewa Agung Ketut Sudarsana, MM, mos asina MoU ho Edukasaun no Kultura Embaixada Indonesia iha Dili, Prof, Dr. Phil, Ikhfan Haris, M. Sc.
Reitor Universidade Bali Internasional, Prof. Dr. dr. I Made Bakta, Sp. PD-KHOM, hatete katak objetivu sira mai iha Timor Leste atu introdus sira nia universidade ba maun-alin no vizinhu sira iha Timor Leste ho esperansa bele kontinua sira nia estudu iha sira nia universidade iha Bali no hili departamentu oi-oin neebe sira iha hanesan, turizmu, ospitalidade no hotelaria, negosiu internasional no sel-seluk tan.
“Ami mai iha nee atu introdus ami nia kampus, tanba ami hakarak konvida ami nia maun-alin sira, ami nia vizinhu sira atu hamutuk hadia sira nia edukasaun hodi sai universidade neebe profesional iha futuru. Espera katak maun-alin sira bele kontinua sira nia estudu iha Bali, tanba Timor Leste ho Bali besik malu,” dehan Reitor I Made Bakta.
Nia haktuir katak husi sira nia universidade hanoin ona atu fo bolsa estudu ba maun-alin sira neebe hakarak kontinua sira nia estudu iha Universidade Internasional Bali. Alein de halao asina MoU, sira mos halo espozisaun edukasaun nian iha PBI Dili.
Entretantu, Adidu Edukasaun no Kultura iha KBRI Dili, Prof. Dr. Phil, Ikhfan Haris, M. Sc, hatete KBRI Dili konvida universidade privadu tolu iha Bali mai iha Timor Leste, tanba sira nia departamentu sira iha relevante ho dezenvolvimentu iha Timor Leste, liu-liu iha area turizmu.
“Ami konvida universidade tolu nee mai iha Timor Leste no ami fasilita sira atu halao espozisaun edukasaun nian iha PBI Dili no asina MoU ho universidade privadu balun iha Timor Leste. Universidade tolu nee iha fundasaun ida deit nia okos no universidade diak liu iha Bali. Ami konvida sira tanba iha Timor Leste setór turizmu dezenvolve hela. Sira sei halo espozisaun edukasaun iha nee no sira hasoru ona ho Ministru Edukasaun koalia kona-ba estabelese Politéknika Turizmu iha Timor Leste,” hatete Adidu Edukasaun no Kultura, Ikhfan Haris.
Tuir nia, alein de halo espozisaun edukasaun nian iha PBI Dili, sira mos halao palestra konvidadu iha Dili no vizita SMK Bekora atu esplora kooperasaun iha ámbitu turizmu internasionál.
Nunee mos Prezidente Politekniku Betano, Prof. Assoc. Adj.Acasio Cardoso Amaral, Ph.D, hatete katak nia asina MoU ho Instituto Turizmu no Negosiu Internasional Bali no Universidade Internasional Bali ho objetivu ba oin bele loke liras atu halao kursu sira iha area relevante sira iha pilar tolu hanesan, ensinu, peskiza no servisu komunidade.
“ Asina MoU nee hanesan ita foin lere dalan atu halo diskusaun no servisu hamutuk iha area neebe iha relevante ho kondisaun iha Timor Leste,” katak Prezidente IPB Betano, Cardoso Amaral.
Iha sorin seluk, Xefe Universidade Bali Internasional, Julang Aryowiloto hatete katak sira asina MoU ho universidade privadu balun iha Dili ho objetivu atu internasionalizasaun sira nia universidade, tanba Timor Leste besik liu ho Bali ka vizinhu. Antes nee, sira iha ona kooperasaun ho Universidade Nasional Timor Lorosae (UNTL) no Universidade Da Paz (UNPAZ).
()
