DILI, STLTIMORLESTE.com – Universidade Nasional Timor Lorosae (UNTL) fo regulamentu ultimatu ba estudante nain rihun 26 resin inativu sira, tanba durante nee la halo prosesu estudu ho diak.
Visi Reitor Asuntu Akademiku UNTL, Samuel Venâncio de Souca Freitas hatete, estudante UNTL hamutuk 48.134 rejistadu, no total 26.000 resin mak konsidera la ativu iha prosesu estudu, signifika katak indikasaun iha la diak, no estudante rasik mos laiha kualidade.
“Ita haree katak estudante la ativu kuantidade boot, nunee husu nafatin sira hodi kontinua nia estudu, hahu iha loron 18 Novembru 2024 too 31 Dezembru 2025, kuandu laiha mak Universidade la tolera, no elimina estudante refere husi aistema akademiku nian,” dehan Visi Reitor, Asuntu Akademiku UNTL ba jornalista sira iha Liceu, Kuarta (13/11/2024).
Tanba UNTL ema neebe la ativu, signifika estudante neebe la halo inskrisaun, tanba nee mak iha periodu ida nee atu fo regularizasaun, nunee iha momentu ida fo 18 mezes ba estudante hotu atu mai regulariza.
“Estudante sira nee mak la mai tuir regularizasaun nee mak ita fo, mak nia sei hetan eliminasaun hasai husi baze dadus akademiku UNTL nian, signifika hasai naran husi Universidade,” nia realsa.
Nia dehan, estudante neebe la ativu sira mak iha Fakuldade Agrikultura, estudante nain 787, Fakuldade Enjineria 753, Fakuldade Edukasaun 2.536, Medisina Ciensia no Saude 195, Ekonomia Gestão 772, Fakuldade Ciensia Sociais 962, Direito 503, EJata 164, Filojofia 238 no Fakuldade foun Turismu 335, hamutuk 7.49.
Tanba nee mak husu ba estudante sira atu sira bele mai halo regularizasaun, liu husi prosesu readministrasaun, iha prazu 18 Novembru, too 31 Julhu 2025, dalan ba asesu mak hatama pedidu ba readministrasaun ba iha Visi Reitor Akademiku, koordena ho fakuldade, hodi fo kondisaun ba eskola fali.
(EST 1)
