DILI, STLTIMORLESTE.com – Porta Voz Polisia Nasionál Timor Leste (PNTL), Superintendente Xefe Polisia João Belo dos Reis hatete, Unidade Patrulhamentu Fronteira (UPF) neebe destakadu iha Fronteira Terrestres konsege asegura joven Timor oan nain 16 neebe tenta ultrapasa ilegal iha Fronteira Terrestre ba nasaun Indonezia, hodi partisipa serimonia graduasaun ba grupu arte marsiais balun.
Nia dehan, tuir dadus Polisia Nasionál Timor Leste (PNTL) asesu katak hahu iha loron 17 fulan Junhu 2025, tuku 11:00 kalan, ekipa UPF halo operasaun konege asegura joven nain 16 tenta ultrapa ilegal iha Fronteira Terrestre ba nasaun Indonezia.
Nia tenik, iha loron hanesan tuku 08:00 dader, UPF asegura sidadaun feto ida ho nisial ANC, deskonfia fasilita hatama sasan kontra bandu kona-ba atributu arte marisiais balun husi Indonezia mai Timor Leste (TL).
“Bainhira ita nia servisu UPF asegura tiha sidadaun sira ho atributu husi grupu arte marsiais balun ita halo identifikasaun kontinua submete ba prosesu investigasaun molok aprezenta ba Ministeriu Publiku (MP) hodi kontinua halo prosesu tuir lei neebe vigora iha Timor Leste,” hatete Porta Voz Polisia Nasionál Timor-Leste (PNTL), Superintendente Xefe Polisia João Belo dos Reis ba jornalista sira iha sala konferensia Kuartel Jerál PNTL Kaikoli, Dili, Tersa (01/07/2025).
Iha fatin ketak, Akademista UNTL, Adérito da Silva informa, Polísia Nasionál Timor Leste (PNTL) liu husi Unidade Polísia Fronteira (UPF) tenke fo segurasa masimu no atensaun makaas ba Timor oan sira neebe sempre ultrapasa ilegal hodi halao sira nia atividade privadu.
“Ita nia UPF tenke servisu makaas no tenke kontrola linha fronteira, tanba ita haree ema tama sai ilegal kontinua iha, no akontese tan iha joven sira neebe tenke ba ilegal hodi halao sira nia atividade grupu arte marsiais nian,” nia afirma.
(jen)
