BAUKAU, STLTIMORLESTE.com – Unidade Servisu Deskonsentradu ho Ministeriu Komersiu no Industria (USD-MKI) hahu kolekta dadus atividade komersiu no industria iha Munisipiu Baukau.
Diretor Munisipal Unidade Servisu Deskonsentradu husi Ministeriu Komersiu no Industria Baukau, Duarte Luis Xavier esplika, iha loron 08 Abril nee ekipa USD-MKI Baukau hahu ona kolekta dadus, neebe faze dahuluk kobre husi Postu Administrativu Baukau Vila no Postu Laga, enkuantu Postu neen hanesan Venilale, Matebian, Vemasi, Kelikai, Baguia no Kelikai Antigu hein faze segundu, bainhira faze primeiru remata ona kolekta dadus.
“Ita hahu halo levantamentu dadus komersiu no industria iha Munisipiu Baukau nee atu sai dadus ba ami serteja kona-ba komersiu loja no kioske, industria produsaun nee iha hira,” hateten Duarte ba STL iha knaar fatin Vila Nova, Baukau, Kuarta (09/04/2025).
Nia sublina, kolekta dadus refere objetivu sai baze fundamentu ba diresaun USD-MKI, tanba USD-MKI nuudar ekipa tekniku husi Ministeriu nian iha baze, nunee prepara dadus liu husi levantamentu hodi antisipa ba formasaun no atividade relevante seluk bainhira akontese prezisa dadus serteja.
Nia fundamenta, durante kolekta dadus, liu-liu atividade industria nian ekipa halo mos verifikasaun ba preokupasaun sira neebe grupu enfrenta, nunee bele ajusta ba planu bainhira grupu rasik aprezenta proposta hodi relata ba nasional bele hetan apoiu fundu husi orsamentu subvensaun publiku, maibe grupu tenke ativu, nunee bainhira apoiu fundu bele eleva prosesamentu produsaun hodi fo rendimentu ba grupu.
“Laos sira nia proposta tama mai ita fo kedas apoiu, lae, maibe ita sei ba fali sira nia fatin hodi haree, loos duni ga lae, tuir duni ami ba halo levantamentu nee sei fo apoiu,” Duarte akresenta.
Diretor nee argumenta, razaun seluk ba kolekta dadus atu antisipa grupu sira mosu lakon, tanba esperiensia tinan 2024 hatudu, bainhira komunidade sira asesu ona totalidade husi orsamentu subvensaun, tenta kria grupu no konsege fo apoiu fundu, maibe hafoin simu tiha fundu, atividade industria la lao iha terenu.
Nia sublina, orsamentu subvensaun ba tinan 2025 nian sei iha faze diskusaun husi ekipa nasional iha Diresaun Ministeriu Komersiu no Industria, nunee Diresaun Munisipal hahu halo kolekta dadus atividade komersiu liu-liu atividade industria inklui halo verifikasaun hodi ajusta iha planu 2025 hein proposta husi grupu.
Entretantu inisiu fulan Janeiru too ohin loron USD-MKI Baukau seidauk simu proposta balun husi grupu atividade industria sira.
(tom)
