DILI, STLTIMORLESTE.com – Estudante ida neebe mak lori diploma sekundariu falsu ba legaliza iha Ministeriu Edukasaun (ME) no la konsege, maibe ninia prosesu investigasaun daudaun lao hela.
Ministru Edukasaun (ME) Interinu, Domingos Lopes Lemos hatoo kestaun nee ba jornalista sira iha edifisiu Ian Martin, Balide, Tersa nee (01/04/2025).
“Ita lao foin ohin mak ita identifika estudantes diploma falsu sira nee, tanba iha tinan kotuk ba mos hanesan ba ensinu sekundariu neebe la tuir ezame nasional, tanba iha falsifikasaun nee rasik, neebe agora iha hela prosesu nia laran, neebe mak balun la konsege too lakon tiha deit, maibe ba sira neebe mak falsifika dokumentus nasaun nian nee sei iha faze investigasaun neebe mak agora lao hela,” nia dehan.
ME Interinu hatutan, ba asuntu nee rasik ninia prosesu agora daudaun lao hela, tanba inspetor sira halo hela servisu, nee duni kona-ba asuntu ida nee inspetor sira halo hela sira nian servisu, atu nunee hodi haree ba asuntu ida nee.
“Agora daudaun ita nian inspetor sira halo hela sira nian servisu nomos seidauk finaliza, kuandu finaliza ona mak fo hatene fali ba ita boot sira,” tenik nia.
Iha fatin hanesan, Deolindo da Cruz nuudar Diretor Jeral Ensinu Sekundariu Jeral no Ensinu Tekniku Vokasional dehan, kona-ba asuntu ida nee sira informa ona ba iha parte inspesaun ninia, nee duni agora daudaun sira buka tuir hela dadus.
“Ita informa ona ba iha inspesaun jeral, agora daudaun inspesaun jeral buka tuir hela dadus,” nia dehan.
(jac)
