DILI, STLTIMORLESTE.com – Eskola Sekundáriu Jeral nu. 4 Setembru Balide simu ona konsesaun eskolar husi Ministeriu Edukasaun (ME) ho montante US$ 23,000 resin, no osan ida nee sei utiliza ba nesesidade administrasaun eskola nian.
Lia hirak nee hatoo husi Diretor ESJ nu. 4 Setembru Balide, Sergio A.da Cruz ba STL Kinta (16/10/2025).
Nia katak, konsesaun eskolar ba eskola ida nee nian tama ona konta bankaria.
“Konaba konsesaun eskolar nee tama tiha ona ami nian konta bankaria eskola nian, ami ba foti tiha ona osan ida nee, no bele uza dadaun ona osan ida nee,ami nian nee hori bainruak mak hau ba foti US$ 23,000 resin. Osan nee hodi bele prepara ba nesesidade administrasaun nian, nunee mos sei rezolve problema sira hanesan pinta turma neebe buradu nee tenke halo mos,” nia esplika.
Nia afirma, konsesaun eskolar ida nee sei haree mos karik iha odamatan balun neebe mak aat tenke troka, atu nunee bele asegura estudantes sira nian numeru ezame ninia, hadia sintina neebe aat. Nee duni agora dadaun husi parte eskola nian ezekuta hela osan ida nee kada estudantes dolar rua.
Jornalista: Jacinta Sequeira
Editora: Domingas Gomes
