DILI, STLTIMORLESTE.com – Tribunal Judisial Primera Instansia Dili halao julgamentu ba arguidu (laen) ho inisial PCS, tanba halo agresaun hasoru lezada (feen) ho inisial JS.
Tuir akuzasaun neebe Juiz prosesu Jose Esquliar lee sai iha Segunda nee (14/10/2024) katak, iha loron 3 fulan Maiu 2020, iha Bekora, arguidu uza liman hodi tuku kona dala barak iha lezada nia kakorok, kauza moras nunee lezada mos halai sai husi kuartu laran ba liur.
Bainhira lezada halai too iha Kampu Laran, arguidu mos duni tuir hodi kontinua lori liman rasta lezada monu ba rai, arguidu aproveita sae iha lezada nia leten, arguidu uza liman hodi tuku kona iha lezada nia hirus matan no knosen, no uza mos liman hodi buti iha lezada nia ibun kauza moras.
Arguidu antes nee hetan ona kondenasaun husi Tribunal. Motivu husi problema nee tanba arguidu tama uma iha kalan ho kondisaun lanu.
Konsekuensia husi arguidu nia hahalok nee halo lezada sente moras iha isin lolon.
Tanba nee, Ministeriu Publiku akuza arguidu komete krime Violensia Domestika ho forma Ofensa Integridade Fizika Simples neebe previstu iha artigu 145 husi Kodigu Penal.
Iha sala julgamentu laran arguidu konfesa ba faktus katak, momentu neeba arguidu kondisaun lanu, ho nunee arguidu la kontrola aan hodi halo aktu ida nee.
Arguidu deklara, lori duni liman tuku lezada, no duni tuir lezada tama too iha Kampu Laran, maibe momentu neeba ho kondisaun lanu.
Arguidu deklara, depois problema tiha, arguidu ba husu deskulpa ba lezada no hakarak atu fila fali ba lezada, maibe lezada lakohi simu arguidu.
Rona tiha deklarasaun husi arguidu nian, Tribunal adia ba loron seluk hodi rona deklarasaun husi lezada.
Audensia Julgamentu nee prezide husi Juiz Singular Jose Esquliar, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Eustaquio Guterres.
(ter)
