DILI, STLTIMORLESTE.com – Ema hotu presiza uza media ho kuidadu, labele problema privadu lekar iha media sosial.
Liafuan nee hatoo husi Peskizador ba Teknolojia Dijital, Fidelis Leite Magalhaes ba jornalista bainhira remata halo enkontru ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Sesta (05/09/2025).
Nia dehan, uluk iha istoria mundu nian difikuldade atu lembra sasan. Ema hotu koko atu lembra sasan, tanba informasaun menus no dadus mos menus nee iha pasadu. Mais agora informasaun hotu-hotu pasa iha mundu vertual nee la sai ona, nia hela metin iha neeba. Entaun informasaun bara-barak tebes, iha Eropa sira dezenvolve konseitu ida agora katak direitu atu ema haluha.
“Forma simples dehan direitu atu apaga ita nia informasaun privadu sira online. Entaun informasaun sira ba tiha online nee, hau sei la gosta informasaun neebe online, favor ida hau bele ba iha Google, facebook iha dever atu hapaga hotu. Problema hanesan ita iha Timor, bainhira ita problema uma laran, buat privadu tebe-tebes ita tau iha online. Problema hirak nee aban bainrua la lakon. Ita nia sasan privadu sira ita tau iha media sosial iha tinan tolu, haat buat nee sei iha nafatin neeba. Aban bainrua bele impata buat barak neebe ita hakarak halo ita nia moris,” dehan Fidelis.
Ezemplu se ema ida lanu todan depois nia toba hela, depois nia halo filme, foto buat sira nee hotu nia tau iha online, tinan lima tiha ba oin, nia ba universidade nia sai tiha mestri diak ida, nia estuda kona-ba edukasaun nia prontu ona atu sai mestri, mais dala ruma nia kompete atu sai mestri ema bele haree fali katak, nia iha foto uluk nia lanu toba hanesan nee, entaun labele servisu ba nia, emprega nia sai mestri tanba nia moral laiha, tanba nia lanu ten.
Mais buat nee loloos akontese tinan lima ba tiha ona, soke buat nee sei iha nafatin online nee mak sei prejudika nia.
“Família inan-aman sira favor ida, media sosial nee ita hanoin katak privadu mais nee publiku, ita dala ruma hanoin tur iha uma laran, neebe ita koalia arbiru deit ema ida la haree. Mais buat hotu neebe ba online nia sei la sai fali, sempre iha dalan nia metin iha neeba, rejista iha neeba, ema sempre bele ba buka hetan no kaer informasaun sae fali ba ita nia leten neebe kuidadu ba ida nee, liu-liu ba labarik foinsae sira, tanba informasaun ida neebe uza agora kuidadu atu aban bainrua labele metin iha neeba no prejudika imi nia moris,” katak nia.
Nia husu ema hotu atu kuidadu ho online, kuidadu filme online sira, kuidadu ho fakar problema uma laran, problema pesoal tau iha online, neebe kuidadu buat hirak nee.
Nunee mos Feto Potensial Merlinda Soares Pinto De Aquino neebe halao knaar mos iha Telkomcel hatete, media social hanesan plataforma ida hodi fasilita ema asesu ba informasaun.
“Tuir hau nia observasaun ba ema sira neebe uza media sosial nee hanesan plataforma ida neebe fasilita ita atu asesu informasaun hotu-hotu liu husi media sosial. Ita agradese tanba iha era glolbalizasaun ida nee ita iha modernizasaun teknolozia oin-oin neebe hamosu media sosial sira, atu ita buka informasaun sira neebe bele aumenta ita nia konesementu sira,” katak nia.
Nia hatete, oinsa atu utiliza media sosial neebe diak ou ladiak fila fali ba konsensia ema idak-idak nian, responsavel ema hotu nian hodi halo mudansa fo impaktu sosial neebe diak.
Tuir nia, papel importante tebes mak atu influensia vibe positivu iha media sosial laos influensia buat neebe la fo impaktu diak ba komunidade, familia no mundu.
Jornalista: Emerenciana Pinto
Editora: Domingas Gomes
