DILI, STLTIMORLESTE.com – Relasiona ho eskola hirak neebe mak uza produtu importadu iha programa merenda eskolar, mak Ministériu Edukasaun (ME) husu responsabilidade Prezidente Autoridade Munisípiu, tanba sira mak responsavel masimu ba asuntu nee.
Xefe Departamentu Programa Merenda Eskolar iha ME, Belchior Maria Almeida Barros esplika, eskola sira liu-liu grupu fornesedor sira neebe mak implementa merenda eskolar nee uza fali hahan importasaun sira, ida nee mak tau ona iha grupu WA, no sira dehan sei konsidera no sei halo asaun, tau iha grupu WA nee ba hotu-hotu, hanesan Prezidente Autoridade husu sira nian responsabilidade, tanba sira mak responsabilidade masimu ba programa merenda eskolar.
“Buat hotu ami halo koordenasaun ho sira, nee sira nian responsabilidade, ami iha grupu WA ida entre Prezidente Autoridade hotu-hotu, Diretor Edukasaun Munisípiu sira, tanba buat hotu nee responsavel autoridade. Ita fo hanoin nafatin para sira bele organiza buat sira nee lao ho diak, tanba dekretu lei 71/2022 nee hatete katak, tenke uza produtu lokal, nee mak horiseik hau fo hanoin ba sira katak, se bele buka ona solusaun para rezolve ona, ita labele foti desizaun mesak, maibe presiza koordena linha ministerial hanesan parte agrikultura munisipiu atu haree problema nee iha neebe,” dehan Belchior ba jornalista STL iha nia knaar fatin, Segunda nee (02/03/2026).
Nia dehan, ME no Ministériu Saude fo deit asistensia, bainhira sira hasoru problema mak solusaun neebe sira bele halo koordenasaun ho linha ministeriais iha nivel munisípiu, liu-liu ba seguransa alimentar, Direitor Agrikultura Munisípal atu koordena hotu atu haree grupu sira neebe mak eziste iha munisipiu sira, liu-liu sira neebe kuda modo, oinsa sira bele organiza lalais.
“Hau fo hanoin ba sira katak, oinsa mak imi halo asaun ba ida nee, se ita husik deit imi iha nee ba bele haree ida nee. Ida nee Prezidente Autoridade sira nian responsabilide, nee fila fali ba sira, oinsa mak sira atu organiza,” nia esplika.
(jac)
