DILI, STLTIMORLESTE.com – Dekretu lei kona-ba regulamentu utilizasaun Estadu sei vale, kuandu seidauk iha alterasaun, tanba nee husu atu se mak utiliza veikulu Estadu halo servisu tuir lei.
“Kuandu seidauk iha alterasaun ba lei, katak lei ida agora kontinua vale, husu ba hotu-hotu neebe mak utiliza veikulu Estadu uza tuir normas, tuir lei legal neebe mak iha,” dehan Komisariu Funsaun Publiku, Agostinho Letencio de Deus ba jornalista sira iha Kaikoli, Dili, Kuarta (05/02/2025).
Nia husu hotu-hotu atu dehan katak, viatura nee la uza ba privadu, la uza ba interese privadu ruma, maibe uza deit ba interese publiku Estadu.
Tanba iha fulan Dezembru liu ba atualiza fali memorandu neebe uluk asina hela, entre Komisaun Funsaun Publiku, KAK, PDHJ Inspetor Jeral, agora sira hahu ona halo diskusaun atu halo intervensaun sira tuir mai liga ba iha utilizasaun veikulu Estadu.
Iha fatin ketak, Ministru Justisa (MJ), Sergio Hornai dehan, ema hotu bele lori karreta Estadu, maibe halao deit servisu.
“Ema hotu bele lori karreta Estadu nian halao deit servisu, la admite uza patrimoniu Estadu ba interese partikular. Tanba nee kuandu sai ona viral, Konselhu Superior liu husi nia deliberasaun atribui kompetensia ba iha Inspetor atu halo prosesa, tanba sa mak bele too iha Tasi Tolu,” dehan MJ, Sergio.
Aleinde nee, Prezidente Tribunal Rekursu (PTR), Deolindo Dos Santos dehan, lei vale ba ema hotu, kona-ba saida mak viral iha media sosial, marka ona loron no Konselhu Superior Majislatura Judisial sei halao reuniaun iha semana nee nia laran iha loron Sesta.
“Lei vale ba hau mezmu nuudar Prezidente, vale ba Juiz sira hotu no vale ba se deit, no la iha tratamentu ida espesial ba ema ida,” dehan PTR, Deolindo.
(ter)
