DILI, STLTIMORLESTE.com – Kada tinan too ona tempu udan ambiente Kapital Dili sempre hasoru difikuldade oin-oin wainhira akontese udan boot bee suli tuir estrada lori lixu naklekar arbiru, kestaun valeta naktiba.
Dehan Alfredo M Soares ba STL iha Bairo-Pite, Kuarta (21/1/2026).
Tuir Alfredo tanba kondisaun valeta la diak la bele akumula udan been wainhira udan tau, hodi resulta bee nalihun iha estrada kria lixu ho tipu oin-oin naklekar iha estrada laran no mos sulin ba komunidade nia uma laran hanesan akontese iha area Bairru Surik Mas, area Kaikoli, Lurumata ho fatin seluk.
Komunidade nee susere ba governu taun importansia ba kondisaun valeta iha bairru laran, wainhira valeta iha bairru laran hadia ona hafoin bele resolve probleme bee suli ba komunidade nia uma inklui lixu.
“Hau rekuinese dadaun liu husi governasaun Nuno Governu Konstitusional halo ona buat barak iha Kapital Dili liu-liu liga ba programa alargamentu estrada, ida nee kapas, maibe keta haluhan tau mos importansia ba kondisaun valeta iha bairru-bairru,”katak nia.
Nia fundamenta, durante nee governu sentral liu husi Munisipiu Dili halo esforsu kada loron, husi dader too loraik sempre hatun ekipa Saneamentu Munisipiu Dili hamos lixu neebe naklekar iha sidade laran. Maibe la bele resolve ho maximu kestaun valeta naktiba iha fatin-fatin hodi resulta bee lori lixu naklekar fali iha komunidade nia leet no mos iha estrada publiku.
Antes nee, Membru Parlamentu Nasional (PN), husi Bankada CNRT, Mateus da Cruz husu ba Ministeriu Administrasaun Estatal ho Autoridade Munisipiu Dili kontrola komunidade soe lixu tuir fatin no tuir oras neebe governu deside ona. Tanba akontese inundasaun iha Kapital Dili, konsekuensia husi lixu plastic ho hena obralan neebe soe arbiru tanba la iha konsiensia husi komunidade too udan tau lori lixu sira nee naklekar fali iha estrada.
Deputadu husi bankada governu nee akresenta, mesmu governu kria ona valeta maibe haree inundasaun kontinua akontese kestaun komunidade rasik falta konsiensia soe lixu iha fatin.
Nunee mos, tuir observasaun STL husi Rotunda Dela too mai area Hudi-Laran Bairru-Pite, Xineza sira loke loja taka menti hotu valeta tanba nee prezudika ekipa Saneamentu hamos maske foer nakonu. Tanba valeta foer nakonu tempu udan bee tun sempre halai tuir Estrada, tuir lolos estrada parte refere hanesan estrada publiku nee duni governu presiza tau atensaun la bele husi ema taka metin valeta.
(god)
